Read the Bible

¹Pan welas an routhow, ev a yskynnas dhe'n menydh, ha wosa ev dhe esedha, y dhyskyblon a dheuth dhodho; ²hag ev a igoras y anow ha'ga dyski, ow leverel,

³‘Gwynnvys an re yw boghosek yn spyrys, rag dhedha i yw gwlaskor nev.

⁴‘Gwynnvys an re usi ow kalari, rag i a vydh konfortys.

⁵‘Gwynnvys an re yw klor, rag i a erit an norvys.

⁶‘Gwynnvys an re a berth nown ha syghes ow yeuni war-lergh ewnder, rag i a vydh lenwys.

⁷‘Gwynnvys an re yw tregeredhus, rag i a gyv tregeredh.

⁸‘Gwynnvys an re pur aga holonn, rag i a wel Duw.

⁹‘Gwynnvys an wrioryon kres, rag i a vydh gelwys fleghes Duw.

¹⁰‘Gwynnvys an re helghys drefenn ewnder, rag dhedha i yw gwlaskor nev.

¹¹‘Gwynnvys owgh pan y'gas despityons ha'gas helghya ha leverel pub eghenn a gabel er agas pynn a-barth dhymmo vy. ¹²Lowenhewgh ha bedhewgh pur heudhik, rag meur yw agas gober y'n nevow, rag yndella y hwrussons helghya an brofoesi neb a veu kyns agas prys hwi.

¹³‘Hwi yw hoelan an bys; mes mar kollas an hoelan y vlas, py ganso y fydh ev sellys? Nyns yw dhe les na fella dhe dravyth marnas dhe vos tewlys dhe-ves ha trettys gans tus.

¹⁴‘Hwi yw golow an bys. Ny yll bos kudhys sita a vo settys war venydh; ¹⁵na ny enowir lugarn ha'y worra yn-dann vushel, mes war an kantolbrenn, hag ev a splannha kemmys a vo y'n chi. ¹⁶Yndella re splanno agas golow a-rag tus may hwellons agas oberow da ha gordhya agas Tas usi y'n nevow.

¹⁷‘Na dybewgh my dhe vos devedhys rag diswul an lagha na'n brofoesi; ny dheuth vy dhe dhiswul saw dhe gollenwel. ¹⁸Rag yn hwir my a lever dhywgh, bys pan dremenno nev ha nor, ny dremen unn dyjynn na unn sin dhiworth an lagha erna vo kowlwrys pup-tra oll. ¹⁹Rakhenna piwpynag a dorro onan a'n gorhemmynnow lyha ma ha dyski dhe dus gul yndella, ev a vydh gelwys an lyha yn gwlaskor nev, mes piwpynag a's gwrello ha'ga dyski, an keth den na a vydh gelwys meur yn gwlaskor nev. ²⁰Rag my a lever dhywgh, marnas agas ewnder a wordremenno ages henna a'n skribys ha'n Fariseow, ny wrewgh mos a-bervedh yn gwlaskor nev.

²¹‘Hwi re glewas bos leverys dhe dus an termyn koth, Ny wredh ladha; ha piwpynag a lattho a vydh yn peryll a vreusyans. ²²Mes my a lever dhywgh, Piwpynag a sorro orth y vroder heb ken a vydh yn peryll a vreusyans, ha piwpynag a lavarro dh'y vroder, “Raka”, a vydh yn peryll a'n Sanhedrin; mes piwpynag a lavarro, “Ty foll” a vydh yn peryll a dan ifarn. ²³Ytho, mars esos ow profya dha ro dhe'n alter, hag ena ty a berth kov bos gans dha vroder neppyth er dha bynn, ²⁴gas ena dha ro a-dherag an alter, ha ke yn-kerdh; kyns oll, bydh unnverhes gans dha vroder, hag ena deus dhe offrynna dha ro. ²⁵Bydh akordys gans dha eskar toeth da ha ty ow kerdhes war an fordh war-barth ganso, rag own dha eskar dhe'th taskorr dhe'n breusydh ha'n breusydh dha dhaskorr dhe'n gwithyas ha ty dhe vos tewlys yn prison. ²⁶Yn hwir y lavarav dhis, ny wre'ta dos yn-mes alena bys may tylli an diwettha bath.

²⁷‘Hwi re glewas bos leverys, “Ny wredh avoutri.” ²⁸Mes my a lever dhywgh, Neb a vir orth benyn gans drokhwans re wrug avoutri seulabrys gensi yn y golonn. ²⁹Dha lagas dyghow mar kwra dha sklandra, tenn e yn-mes ha towl e dhiworthis; rag y fydh dhe les dhis onan a'th eseli dhe vos dhe goll, ha na vo tewlys oll dha gorf yn ifarn. ³⁰Mar kwra dha leuv dhyghow dha sklandra, trogh hi dhe-ves ha towl hi dhiworthis, rag y fydh dhe les dhiso onan a'th eseli dhe vos dhe goll, ha na vo tewlys oll dha gorf yn ifarn.

³¹‘Ynwedh y feu leverys, “Neb a worro dhe-ves y wreg, gwres ev ri dhedhi skrifenn didhemmedhyans.” ³²Mes my a lever dhywgh, Piwpynag a worro dhe-ves y wreg marnas kaws dijastita, ev a's gwra avoutres; ha neb a dhemmettho benyn dhidhemmedhys, ev a wra avoutri.

³³‘Arta, hwi re glewas bos leverys dhe dus an termyn koth, “Ny wredh terri dha di, mes ty a dal kewera tiow gwrys dhe'n Arloedh.” ³⁴Mes my a lever dhywgh, Na wrewgh tiow mann: naneyl re'n nev, rag tron-sedha Duw ywa, ³⁵na re'n dor, rag skavell y dreys yw ev, na re Yerusalem, rag sita an Myghtern meur yw hi, ³⁶naneyl na wra ti re'th penn, rag ny yll'ta gul dhe unn vlewenn bos naneyl gwynn na du. ³⁷Mes bedhes agas lavar, Yw, yw, Nag yw, nag yw; ha pup-tra oll eus pella es henna, a'n tebel el ywa.

³⁸‘Hwi re glewas bos leverys, “Lagas rag lagas ha dans rag dans.” ³⁹Mes my a lever dhywgh, Na sevewgh erbynn neb yw drog, saw piwpynag a'th wesko war dha vogh dhyghow, treyl dhodho hy ben ynwedh; ⁴⁰ha mar mynn nebonan dha siwya dre lagha ha doen dha bows dhiworthis, ro dhodho dha vantell ynwedh; ⁴¹ha neb a'th konstrynno dhe lavurya unn mildir, ke ganso dew. ⁴²Ro dhe neb a wovynno orthis, ha na wra omdenna dhiworth an den a vynnsa chevisya ahanas.

⁴³‘Hwi re glewas bos leverys, “Ty a wra kara dha gentrevek ha kasa dha eskar.” ⁴⁴Mes my a lever dhywgh, Kerewgh agas eskerens ha pysewgh rag an re a wra agas helghya, ⁴⁵may hallowgh hwi bos mebyon agas Tas usi y'n nevow, rag ev a wra dh'y howl drehevel keffrys war an re dhrog ha'n re dha, hag a dhannvon an glaw war an re ewnhynsek ha'n re gammhynsek. ⁴⁶Rag mar kerewgh an re usi orth agas kara hwi, pana wober a'gas bydh? A ny wra ynwedh an dolloryon an keth tra? ⁴⁷Ha mar ny salusewgh marnas agas breder, pandra moy a wrewgh hwi es dell wra tus erell? A ny wra ynwedh an Jentilys an keth tra? ⁴⁸Rakhenna, bedhewgh hwi perfydh kepar dell yw agas Tas nevek perfydh.