Read the Bible

¹Wosa an Sabot, ha hi boragweyth y'n kynsa dydh a'n seythun, Maria Magdalena ha'n Varia arall a dheuth dhe vires orth an bedh, ²hag otta, yth esa dorgrys meur; rag el an Arloedh, diyskynnys a nev, a dheuth, hag ev a rolyas dhe-ves an men hag esedha warnodho. ³Y semlans o avel lughes, ha'y wisk gwynn avel an ergh. ⁴Ha'n withysi, rag own anodho, a grenas ha gyllys ens avel tus varow. ⁵Mes an el a worthybis, ha leverel dhe'n benynes, ‘Na berthewgh own, rag my a woer hwi dhe hwilas Yesu neb a veu krowsys. ⁶Nyns usi omma, rag drehevys yw dell leveris ev; dewgh, gwelewgh an tyller mayth esa ow krowedha. ⁷Ha kewgh dihwans dhe leverel dh'y dhyskyblon, “Drehevys a'n re varow, hag otta, yma ev ow mones a-dheragowgh dhe Alile, ena hwi a wra y weles.” Otta, my re'n derivas dhywgh.’ ⁸Hag i a omdennas yn uskis dhiworth an bedh gans own ha lowena veur, ha poenya dhe ri derivadow dh'y dhyskyblon. ⁹Hag awotta Yesu a wrug aga dyerbynna ow leverel, ‘Lowena dhywgh.’ Ha pan dheuthons dhodho, i a dhalghennas y dreys ha omblegya dhe'n dor a-dheragdho. ¹⁰Ena yn-medh Yesu dhedha, ‘Na berthewgh own; kewgh, leverewgh dhe'm breder mos yn-kerdh dhe Alile, hag ena i a'm gwel.’

¹¹Hag i ow mos yn-rag, otta, re a'n withysi eth dhe'n sita ha derivas dhe'n bennoferysi pup-tra oll a hwarva. ¹²Wosa i dhe omguntell war-barth gans an henavogyon hag omgusulya, i a ros meur a vona dhe'n soudoryon ¹³hag yn-medhons, ‘Leverewgh, “Y dhyskyblon a dheuth y'n nos ha'y ladra ha ni ow koska.” ¹⁴Ha mara teffa an derivadow ma dhe glew an governour, ni a'n perswad, ha'gas gwitha divern.’ ¹⁵I a gemmeras an mona ha gul kepar dell veu dyskys dhedha. Ha'n hwedhel ma yw kyhwedhlys yn mysk an Yedhewon bys y'n jydh hedhyw.

¹⁶An unnek dyskybel eth dhe Alile, dhe'n menydh a wrug Yesu y apoyntya dhedha. ¹⁷Ha pan y'n gwelsons, i a'n gordhyas, mes re a dhoutyas. ¹⁸Ha Yesu a dheuth, ha kewsel dhedha, ow leverel, ‘Pub galloes yn nev ha war an nor re beu res dhymm. ¹⁹Ewgh ytho ha gwra dhe oll an kenedhlow bos dyskyblon, orth aga besydhya yn hanow an Tas, ha'n Mab, ha'n Spyrys Sans, ²⁰ha'ga dyski dhe witha pup-tra oll a worhemmynnis vy dhywgh; hag awotta, yth esov genowgh pup-prys bys worfenn bys.’