Read the Bible

¹Ternos vyttin, oll an bennoferysi ha henavogyon an bobel a wrug omgusulyans erbynn Yesu rag y worra dhe'n mernans; ²ha wosa i dh'y gelmi, i a'n dug yn-kerdh ha'y dhaskorr dhe Pilat an governour.

³Ena Yudas neb a'n traytas, pan welas ev dhe vos dampnys, a goedhas yn edrek hag a dhros an deg bath warn ugens a arghans arta dhe'n bennoferysi ha'n henavogyon, ⁴ow leverel, ‘My re beghas a-ban draytis goes gwiryon.’ Yn-medhons i, ‘Pandr'yw henna dhyn ni? Ty dha honan preder anodho.’ ⁵Ha wosa tewlel an mona y'n tempel, ev a omdennas ha mones hag omgregi. ⁶An bennoferysi a gemmeras an mona ha leverel, ‘Nyns yw lafyl y worra yn tresorva an tempel, rag y vos pris goes.’ ⁷Ha wosa omgusulya, i a brenas ganso gwel an priweythor avel ynkleudhva rag estrenyon. ⁸Rakhenna an gwel na yw henwys Gwel an Goes bys y'n jydh hedhyw. ⁹Ena y feu kollenwys an dra kewsys dre Yeremia an profoes, ow leverel, Hag i a gemmeras an deg bath warn ugens a arghans, pris an den talvesys, neb a veu talvesys gans mebyon Ysrael, ¹⁰hag i a's ros rag gwel an gweythor pri, dell ordenas an Arloedh dhymm.

¹¹Yesu a sevis a-rag an governour; ha'n governour a wovynnas orto, ow leverel, ‘Os ta myghtern an Yedhewon?’ Yn-medh Yesu, ‘Ty a'n lever.’ ¹²Ha pan ova kuhudhys gans an bennoferysi ha'n henavogyon, ny worthybis travyth. ¹³Ena yn-medh Pilat dhodho, ‘A ny glewydh py lies tra y tustunions er dha bynn?’ ¹⁴Hag ev ny worthybis dhodho unn ger vytholl, mayth o marth meur dhe'n governour.

¹⁵Yth o dhe'n governour us y'n goel dhe dhelivra unn prisner dhe'n routh, piwpynag a vynnens. ¹⁶Hag y'n eur na, yth esa dhedha prisner drog-gerys gelwys Barabbas. ¹⁷Ytho pan ens i kuntellys war-barth, Pilat a leveris dhedha, ‘Pyneyl a vynnowgh may hwrylliv y dhelivra dhywgh, Barabbas, po Yesu yw henwys Krist?’ ¹⁸Rag ev a wodhya i dh'y dhaskorr der atti. ¹⁹Ha ev esedhys yn barr an vreus, y wreg a dhannvonas dhodho, ow leverel, ‘Ty na wra mellya gans an den gwiryon na, rag my a wodhevis lower hedhyw yn hunros a'y wovis ev.’ ²⁰Mes an bennoferysi ha'n henavogyon a dhynyas an routhow dhe wovynn Barabbas dhe vos delivrys, ha distrui Yesu. ²¹Ena y hworthybis an governour ha leverel dhedha, ‘Pyneyl a'n dhew y fynnowgh orthiv delivra dhywgh?’ Yn-medhons, ‘Barabbas.’ ²²Yn-medh Pilat dhedha, ‘Pandr'a wrav vy orth Yesu yw gelwys Krist?’ I oll a leveris, ‘Bedhes krowsys!’ ²³Yn-medh ev, ‘Pana dhrog ytho a wruga?’ Mes i a armas dhe voy ow leverel, ‘Bedhes krowsys!’

²⁴Ha Pilat, pan welas na ylli gwaynya travyth, mes yth esa freudh ow talleth, a gemmeras dowr ha golghi y dhiwla a-rag an routh ow leverel, ‘Ankablus yth o'ma a woes an den ma. Hwi agas honan prederewgh anodho.’ ²⁵Ha'n bobel oll a worthybis ow leverel, ‘Re bo y woes warnan ni ha war agan fleghes.’ ²⁶Ena ev a dhelivras Barabbas dhedha, mes Yesu ev a skorjyas ha'y ri dhe vos krowsys.

²⁷Ena soudoryon an governour a worras Yesu dhe'n pretorium hag a guntellas oll an bagas a soudoryon a-dro dhodho. ²⁸Wosa y dhestryppya, i a worras mantell gogh a-dro dhodho. ²⁹I a plethas kurun a spern ha'y gorra war y benn ha korsenn yn y leuv dhyghow; hag ow koedha war benn-dewlin a-dheragdho, i a wrug ges anodho ow leverel, ‘Hayl, Myghtern an Yedhewon!’ ³⁰i a drewas warnodho ha kemmeres an gorsenn hag yth esens orth y weskel war y benn. ³¹Wosa gul ges anodho, i a dhi'skas an vantell ha'y wiska gans y dhillas y honan, ha'y dhoen yn-kerdh dhe vos krowsys.

³²Ow mos yn-mes, i a gavas den a Kyrene, henwys Simon; i a wrug y gonstryna dhe dhoen y grows. ³³Pan ens devedhys dhe dyller henwys Golgotha (henn yw Tyller Krogen), ³⁴i a ros dhodho dhe eva gwin kemmyskys gans bystel; mes wosa ev dh'y dastya, ny vynnas y eva. ³⁵Ha pan y'n krowssons i a rannas y dhillas ow tewlel prenn. ³⁶Ena i a esedhas, ha'y witha ena. ³⁷Hag a-ugh y benn, i a worras skrif an kuhudhans er y bynn, ‘Hemm yw Yesu, Myghtern an Yedhewon.’

³⁸Ena y feu krowsys ganso dew lader, an eyl a'y barth dhyghow, ha'y gila a'y barth kledh. ³⁹An dremenysi a wrug bismer dhodho, ow shakya aga fenn, ⁴⁰ha leverel, ‘A ty, neb a dhistru an tempel ha'y dhrehevel kyns penn trydydh, omsaw dha honan mars os Mab Duw, ha diyskynn a'n grows.’ ⁴¹Y'n keth vaner, an bennoferysi gans an skribys ha'n henavogyon ow kul ges a leveris, ⁴²‘Tus erell ev a's sawyas, ev y honan ny yll omsawya; Myghtern Ysrael ywa, diyskynnes lemmyn a'n grows ha ni a grys dhodho; ⁴³ev a fydhyas yn Duw, re'n deliffro lemmyn mara'n mynn; rag ev a leveris, “My yw Mab Duw.” ’ ⁴⁴Y'n keth vaner ynwedh, yth esa an ladron neb o krowsys ganso orth y dhespitya.

⁴⁵Dhiworth an hweghves eur yth esa tewolgow war oll an nor bys y'n nawves eur. ⁴⁶Hag a-dro dhe'n nawves eur, Yesu a armas ughel y lev ow leverel, ‘Eli, Eli, lema sabaghthani?’ henn yw: ‘Ow Duw, Ow Duw, prag y'm forsaksys?’ ⁴⁷Re an dus a sevi ena, pan y'n klewsons a leveris, ‘Yma an den ma ow karma war Elias.’ ⁴⁸Dhihwans, onan anedha a boenyas dhe gavoes spong hag a'n lenwis a aysel, ha'y worra war welenn ha'y ri dhodho dhe eva. ⁴⁹Mes an re erell a leveris, ‘Gesewgh ni dhe weles mar teu Elias rag y sawya.’ ⁵⁰Ena Yesu a armas arta ughel y lev hag a dhaskorras an enev. ⁵¹Hag otta, vayl an tempel a veu skwardys yntra diw rann, a'n penn a-wartha bys y'n goeles. Y feu dorgrys ha'n karregi a veu felsys. ⁵²An bedhow a veu igerys ha meur a gorfow a'n syns koedhys yn kosk a veu drehevys; ⁵³hag i a dheuth yn-mes a'n bedhow wosa y dhasserghyans, ha mos y'n sita sans hag omdhiskwedhes dhe lies huni. ⁵⁴Ha'n penn-kangour ha'n re esa ganso ow kwitha Yesu, pan welsons an dorgrys hag oll a hwarva, a borthas own meur, ow leverel, ‘Yn tevri hemma o Mab Duw.’ ⁵⁵Yth esa ena ynwedh lies benyn ow mires a-bell, neb a holyas Yesu dhiworth Galile, orth y servya. ⁵⁶Yn aga mysk yth esa Maria Magdalena, ha Maria mamm Jamys ha Yoses, ha mamm mebyon Zebede.

⁵⁷Devedhys an gorthugher, den rych a Arimathea, henwys Yosep, a dheuth, neb y honan ynwedh o dyskybel dhe Yesu. ⁵⁸Ev eth dhe Pilat ha govynn orto korf Yesu. Ena Pilat a erghis may fe res dhodho. ⁵⁹Ha wosa ev dhe gemmeres an korf, Yosep a'n maylyas yn lien glan ⁶⁰hag a'n gorras yn y vedh nowydh a wrussa y dreghi y'n garrek. Wosa ev dhe rolya men bras a-dreus dhe dharas an bedh, yth eth yn-kerdh. ⁶¹Hag yth esa ena Maria Magdalena ha'n Varia arall, esedhys a-dal an bedh.

⁶²Ternos, an jydh wosa Darbar an Goel, an bennoferysi ha'n Fariseow a omguntellas war-barth ha mos dhe Pilat, ⁶³ow leverel, ‘Arloedh, yma kov dhyn an toeller na, pan o hwath yn few, dhe gewsel, “Wosa trydydh y hwrav dasserghi.” ⁶⁴Argh, ytho, may fo an bedh diogelys bys y'n tressa dydh rag na dheffo y dhyskyblon yn nos ha'y ladra ha leverel dhe'n bobel, “Drehevys veu dhiworth an re varow;” hag yndella an toell diwettha a vydh gweth ages an kynsa.’ ⁶⁵Yn-medh Pilat dhedha, ‘Yma gwithysi genowgh; kewgh, ha'y dhiogeli dell wodhowgh.’ ⁶⁶Hag yth ethons ha diogeli an bedh, ow selya an men ha gorra gwithysi warnodho.