Job 37
1‘Drefenn hemma ynwedh ow holonn a gren,
ha lemmel dhiworth hy le.
2Goslowewgh orth taran lev Duw
hag orth an grommyans a dheu dhiworth y anow.
3Ev a liver y daran yn-dann an nev oll,
ha'y lughes dhe sornow an norvys.
4Wosa henna y lev a vedhygel;
ev a darenn gans lev meuredhek
ha ny lett ev an lughes kettell vo y lev klewys.
5Duw a darenn yn fordhow marthys;
ev a wra taklow bras dres agan konvedhes.
6Rag dhe'n ergh ev a lever, “Koedh war an dor”;
ha dhe gowas a law, “Bydh krev”.
7Ev a lett pub den oll rag oberi,
mayth aswonno oll tus y ober.
8An bestes a omgudh
ha gortos yn aga fowys.
9An korwyns a dheu dhiworth y jambour,
ha yeynder dhiworth an gogledh.
10Gans anall Duw yey yw formys,
ha'n dowrow ledan yw rewys kales.
11Ev a garg an kommol a lybor;
an kommol a skatter y lughes.
12I a dreyl a-dro der y gevarwoedhyans,
i a wra an pyth yw gorhemmynnys ganso
war enep an bys oll.
13Po rag kessydhyans, po rag y dir
po rag tregeredh, ev a wra dhedha dos.
14‘Klew hemma, A Job;
sav kosel, ha preder a-dro dhe oberow marthys Duw.
15A wodhes fatell worhemmynn Duw an kommol,
ha gul dhe lughes y gommol splanna?
16A wodhes fatell neuvell an kommol,
oberow marthys anodho ev neb yw perfydh y wodhvos,
17ty hag yw toemm y'th tillas
pan yw tesek an bys yn-dann gwyns an dyghow?
18A yllydh, kepar hag ev, ystynn an nevow,
mar grev avel mirour teudhys?
19‘Dysk dhyn an pyth a wren ni leverel dhodho;
ny yllyn restra agan ken drefenn an tewlder.
20A dhegoedh bos leverys dhe Dhuw y mynnav kewsel?
Eus gour a byssa dhe vos kollenkys?
21Ha lemmyn ny yll tus mires orth an golow
pan usi ow splanna y'n nevow,
wosa an gwyns dhe dremena ha'ga glanhe.
22Dhiworth an gogledh y teu splannder owrek;
war Dhuw yma meuredh euthyk.
23An Ollgalloesek – ny yllyn y gavoes;
meur yw y nerth, ha'y vreus,
hag yn y wirvreus ha'y ewnder bras ny arwask ev.
24Rakhenna tus a berth own anodho;
ha ny wra vri a'n dus yw fur yn tybyans aga holonn aga honan.’