Read the Bible

²‘Gorta tamm pella ha my a dhiskwedh dhis,

rag yma moy dhe vos leverys a-barth Duw.

³My a dhre ow godhvos dhiworth pell,

ha my a askrif gwiryonedh dhe'm Gwrier.

⁴Dhe wir, ow geryow nyns yns kamm;

Yma genes den perfydh y wodhvos.

⁵‘Galloesek yw Duw ha nyns yw denvyth kasadow dhodho;

ha meur yw yn nerth a gonvedhes.

⁶Ny with ev an drogoberer yn few,

mes ev a re gwirvreus dhe'n voghosogyon.

⁷Ny gemmer y dhewlagas dhiworth an den gwiryon,

mes kepar ha myghternedh ev a's sett war dronyow

ha'ga ughelhe bys vykken.

⁸Ha mars yns kelmys yn kargharow

ha synsys fast dre gerdyn a alar,

⁹ev a dhiskwa dhedha an pyth re wrussons,

ha'ga hammwriansow a wrussons yn hwoethus.

¹⁰Ev a iger aga diwskovarn dhe dhyskans,

ha gorhemmynn dhedha dehweles dhiworth drog.

¹¹Mar koslowons ha'y servya,

i a spen aga dydhyow yn sewenyans,

ha'ga blydhynyow yn lowender.

¹²Mes mar ny woslowons, i a dhe goll der an kledha,

ha tremena heb godhvos.

¹³‘An dus dhidhuw y'n kolonn a berth sorr;

ha ny grions rag gweres hwath pan wra ev aga helmi.

¹⁴I a verow yn aga yowynkneth,

yn mysk an horys-tempel worow.

¹⁵Mes Duw a dhelirv an den galarek der y alar,

ev a iger aga diwskovarn yn aga arwask.

¹⁶Ev a'th tynyas ynwedh dhiworth ahwer

dhe dyller ledan ma nag esa stroetha,

dhe gonfort moes leun a vlonek.

¹⁷‘Mes leun os a vreus erbynn an tebelwas;

breus ha gwirvreus re'th synsis.

¹⁸Bydh war na wrello denvyth dha dhynya gans rychys,

ha na wrello falswober bras dha dreylya a-denewen.

¹⁹A wra dha gri po oll nerth dha grevder

dha witha rag ahwer?

²⁰Na yeun war-lergh an nos,

pan yw poblow kemmerys dhe-ves yn-mes a'ga le.

²¹Bydh war, na dreyl dhe dhrog;

rag drefenn hemma ty re beu prevys gans galar.

²²Otta, ughelhes yw Duw yn y nerth;

piw yw dyskador kepar hag ev?

²³Piw re ragsettyas dhodho y fordhow,

po leverel dhodho, “Ty re gammwrug”?

²⁴‘Porth kov dhe wormel y ober,

re ganas gwer a-dro dhodho.

²⁵Tus oll re viras orto;

mab-den a vir dhiworth pell.

²⁶Ass yw Duw meur, dres agan konvedhes!

Anhwiladow yw niver y vlydhynyow.

²⁷Ev a denn war-vann an dagrennow a dhowr

ha sidhla glaw dhiworth an niwl;

²⁸an kommol a dhinwa war-nans,

ha gasa glaw dhe goedha gans palster war vab-den.

²⁹Piw a gonvedh omlesans an kommol,

po taran y babell?

³⁰Otta, ev a skatter y lughes a-dro dhodho

ha kudha gwreydhyow an mor.

³¹Yndella ev a vag an poblow;

ev a re palster a voes.

³²Ev a gudh y dhorn gans golow,

hag a worhemmynn dhodho gweskel an gostenn.

³³Son an taran a dheriv an tewedh dhe dhos,

ha'n chatel ynwedh a dhiskwa hager-awel dhe dhos.