Yeremia 48
Breus war Moab
1A-dro dhe Moab.
Yndellma y lever Arloedh an luyow, Duw Ysrael:
Go-ev, Nebo, gwastys yw!
Kiryathaym yw gorrys dhe veth ha kemmerys;
Misgab yw methek hag a berth euth.
2Ny vydh namoy gormel a Moab.
Yn Heshbon i re dewlis drog er hy fynn:
‘Dewgh, treghyn hi dhe-ves ma na vo kenedhel!’
Hwi ynwedh, A Madmen, a vydh diswrys;
an kledha a'th pursiw.
3Lev kri a-dhiworth Horonaym:
‘Ynyalder, ha distruyans meur!’
4‘Moab yw distruys!’
a gri hy re vyghan.
5Rag y'n fordh-yskynna dhe Luhith
i a yn-bann owth oela yn hwerow;
rag y'n fordh yn-nans dhe Horonaym
an eskar re glewas kri a angoes rag an distruyans.
6Fiewgh, omsawyewgh,
ha bedhewgh avel asen gwyls y'n difeyth.
7Rag drefenn ty dhe fydhya yn dha dhinasow hag y'th tresoryow,
ty ynwedh a vydh kemmerys;
Kemosh a yn divroedh,
war-barth gans y oferysi ha'y bennsevigyon.
8An distruer a dheu dhe bub sita,
ha ny dhiank sita vyth;
an nans a dhe goll,
ha'n ughelgompesenn a vydh distruys,
par dell gewsis an Arloedh.
Notes for verses 7–81 entry
Text notes
Jeremiah 48:7 dhinasow: Ow siwya an Septuagint. Ebrow oberow. View in passage
9Gorrewgh hoelan war Moab,
rag hi a vydh magoryow;
hy threvow a vydh ynyal,
heb annedhyas ynni.
10Milliges yw ev neb yw diek ow kul ober an Arloedh, ha milliges yw ev neb a with y gledha dhiworth skoellya goes.
11Moab re beu attes a'y yowynkneth,
sedhys avel gwin war y wodhes;
ny veu gwakhes a lester dhe lester,
na nyns eth yn divroedh;
ytho y vlas re wortas ynno,
ha nyns yw y sawer chanjys.
12Rakhenna, otta, an dydhyow a dheu, yn-medh an Arloedh, pan dhannvonav dhodho rennysi-gwin dh'y dreuslestra, hag i a wakha y lestri, ha terri y sethow yn darnow. 13Ha Moab a'n jevydh meth a Kemosh, dell borthas chi Ysrael meth a Bethel, may trestsons ynno.
14Fatell yllowgh leverel, ‘Kasoryon alloesek on ni,
ha gwer nerthek rag an vresel’?
15Distruer Moab ha'y sitys re dheuth yn-bann,
ha'y wer yowynk dhewisys res eth yn-nans dhe'n ladhva,
yn-medh an Myghtern, Arloedh an luyow yw y hanow.
16Yma terroes Moab yn ogas
ha'y anfeusi a nes yn uskis.
17Kynewgh warnodho, hwi oll yn y gyrghynn,
ha peub a aswonn y hanow;
leverewgh, ‘Ass yw terrys an dernwelenn alloesek,
an vagel splann!’
18Diyskynn a'n golewder,
hag esedh war an dor kras,
ty annedhyades, myrgh Dibon!
Rag distruer Moab re dheuth yn-bann er dha bynn;
ev re dhistruis dha dinasow.
19Sav ryb an fordh ha mires,
ty annedhyades Aroer!
Govynn orto ev neb a fi ha'n venyn neb a dhienk;
lavar, ‘Pandr'a hwarva?’
20Moab yw gorrys dhe veth, rag hy bos terrys;
kynewgh hag oelewgh!
Leverewgh e yn Arnon,
Moab dhe vos gwastys.
21Barn re dheuth war an ughelgompesenn, war Holon, ha Yahasa ha Mefaath, 22ha Dibon, ha Nebo, ha Beth-dibathaym, 23ha Kiryathaym, ha Beth-gamul, ha Beth-meon, 24ha Kerioth, ha Bosra, ha war oll an sitys a bow Moab, pell hag ogas. 25Korn Moab yw treghys dhe-ves, ha'y bregh yw terrys, yn-medh an Arloedh.
26Gwrewgh dhodho bos medhow, drefenn ev dhe omvoghhe erbynn an Arloedh; gesewgh Moab dhe omlagenna yn y hwyj y honan; hag ev ynwedh a vydh ges. 27A nyns o Ysrael ges dhis, kyn nag o kevys yn mysk ladron? Rag peskweyth may kewssys anodho ty a shakyas dha benn!
28Gesewgh an sitys, ha trigewgh y'n garrek,
hwi annedhysi Moab!
Bedhewgh avel an golomm a neyth
yn amal ganow kownans.
29Ni re glewas a woeth Moab –
ha pur woethus yw ev –
a'y ughelder, ha'y woeth ha'y valghder,
hag a'y golonn howtyn.
30My a woer y sorr, yn-medh an Arloedh;
y vraslavarow yw fals,
y weythresow yw fals.
31Ytho my a oul rag Moab;
my a gri rag Moab oll;
rag gwer Kir-heres my a gyn.
32Moy es an oelva rag Yazer my a oel ragos,
ty winwydhenn Sibma.
Dha skorrennow a ystynnas a-dreus dhe'n mor,
devedhys bys Yazer;
war dha frutys hav ha trevas dha wingreun
an distruer re goedhas.
33Heudhder ha lowena yw kemmerys dhe-ves
a'n tir feyth a Moab;
my re wrug dhe hedhi gwin a'n gwinwaskow;
ny drett denvyth gans garmow lowender;
an arm ny vydh garm a lowender.
34Son aga kri a dheu dhiworth Heshbon bys Eleale, bys Yahas, dhiworth Soar bys Horonaym hag Eglath-shelishia. Rag hwath dowrow Nimrim yw devedhys ha bos difeyth. 35Ha my a dhre diwedh yn Moab, yn-medh an Arloedh, dhodho ev neb a offrynn sakrifis yn tyller ughel ha leski offrynnow dh'aga duwow. 36Ytho ow holonn a gyn rag Moab avel pibow, hag ow holonn a sen avel pibow rag gwer Kir-heres; rag an rychys re gavsons yw gyllys.
37Rag pub penn a vydh moel ha pub barv treghys dhe-ves; war bub leuv y fydh skwardyow, hag yskar war an klunyow. 38War do pub chi yn Moab, hag yn hy stretow nyns eus marnas kynvann; rag my re dorras Moab avel lester nag eus hwans anodho, yn-medh an Arloedh. 39Ass yw hi terrys! Ass wrons kyni! Ass wrug Moab treylya hy heyn yn meth! Ytho Moab yw devedhys ha bos ges hag euth dhe beub yn y gyrghynn.
40Rag yndellma y lever an Arloedh:
Otta, ev a nij yn-nans avel er,
ha lesa y dhiwaskell erbynn Moab;
41an sitys a vydh kemmerys
ha'n dinasow dalghennys.
Kolonn kasoryon Moab y'n jydh na
a vydh kepar ha kolonn benyn yn hy gwelivesi.
42Moab a vydh distruys ma na vydh pobel na fella,
drefenn ev dhe omvoghhe erbynn an Arloedh.
43Yma own, pytt, ha maglenn
a-ragos, ty annedhyas Moab!
yn-medh an Arloedh.
44Seul a fi a'n browagh
a goedh y'n pytt,
ha seul a glamber yn-mes a'n pytt
a vydh kechys y'n vaglenn.
Rag my a dhre an traow ma war Moab
yn blydhen aga hessydhyans,
yn-medh an Arloedh.
45Yn skeus Heshbon
fowesigyon a hedhis, heb nerth;
rag tan a dheuth yn-mes a Heshbon,
flamm yn-mes a ji Sihon;
ev a dhistruis tal Moab,
ha kurun penn mebyon an tervans.
46Go-jy, Moab!
Pobel Kemosh res eth dhe goll,
rag agas mebyon yw kemmerys yn keth,
ha'th vyrghes yn kethneth.
47Mes my a dreyl kethneth Moab
y'n dydhyow diwettha, yn-medh an Arloedh.
Bys hemma yma an varn war Moab.