Yeremia 47
Breus war an Filistysi
1Ger an Arloedh a dheuth dhe Yeremia an profoes a-dro dhe'n Filistysi, kyns Faro dhe weksel Gaza:
2Yndellma y lever an Arloedh:
Otta, dowrow a dardh a'n gogledh
hag a vydh keynres fennys;
i a fenn an tir ha pup-tra eus ynno,
an sita ha'n re trigys ynni.
Pobel a skrij,
hag oll annedhysi oll an tir a gyn.
3Orth tros stankya karnow y vergh krev,
orth klattrans y jarettow, orth grommyans aga rosow,
ny dreyl an tasow dhe sawya aga fleghes,
mar wann yw aga diwleuv,
4Rag an jydh re dheuth
dhe dhistrui oll an Filistysi,
dhe dreghi a-dhiworth Tyr ha Sidon
pub gwereser yw gesys.
Rag an Arloedh a dhistru an Filistysi,
remenant arvordir Kaftor.
5Moelder re dheuth war Gaza,
avlavar yw Ashkelon.
A remenant an Anakim,
pes termyn yth omhakkydh?
6A, kledha an Arloedh,
pes termyn y fydh bys pan vi kosel?
Dehwel y'th woen,
powes ha bydh kosel.
7Fatell yll bos kosel
pan ros an Arloedh gorhemmynn?
Erbynn Ashkelon hag erbynn an morrep –
ena ev re'n erviras.