Yeremia 15
Tenkys Pobel Yuda
1Ena an Arloedh a leveris dhymm: Mar saffa Moyses ha Samuel a-ragov, hwath ny allsa ow holonn treylya war-tu an bobel ma; gwra aga dannvon mes a'm golok, ha'ga gasa dhe vones. 2Hag y hwyrvydh, mar leverons dhis, ‘Ple'th en alemma?’ Ena ty a lever dhedha: Yndellma y lever an Arloedh:
Seul yw rag mernans, dhe'n mernans;
ha seul yw rag an kledha, dhe'n kledha;
ha seul yw rag an divoetter, dhe'n divoetter;
ha seul yw rag an gethneth, dhe'n gethneth.
3Ha my a wra ordena warnedha peswar eghenn a derroes, yn-medh an Arloedh: an kledha dhe ladha, ha'n keun dhe skwardya, hag ydhyn an nev, ha bestes an nor, dhe dhevorya ha dhe dhistrui. 4Ha my a wra dhedha bos euth rag oll gwlaskordhow an nor, drefenn Manasse mab Hezekia myghtern Yuda, rag an pyth a wrug ev yn Yerusalem.
5Rag piw a gemmer truedh ahanas A Yerusalem?
po piw a'th kyn?
po piw a geskodhev genes
dhe wovynn a-dro dhe'th yeghes?
6Ty re'm denaghas, yn-medh an Arloedh,
ty yw gyllys war-dhelergh:
ytho my a ystynn ow leuv er dha bynn, ha'th tistrui;
skwith ov ow koedha yn edrek.
7Ha my a's gwynsell gans forgh-dhrushya
yn yetow an tir;
my a's gwrug anvap, my a dhistru ow fobel,
a-ban na dhehwelsons a'ga fordhow.
8Aga gwedhwesow yw ynkressys dhymm
moy es tewes an moryow;
my re dhros erbynn mammow an wer yowynk
diswrier dhe hanter-dydh:
my re wrug skruth hag euth
dhe goedha distowgh warnedha.
9Hi neb re dhineythis seyth a vydh ydhil:
hi re dhyenas;
hy howl yw sedhys pan yw hwath dydh;
hi re borthas meth ha bismer;
ha'n re yw gesys anedha my a dhannvon dhe'n kledha
a-rag aga eskerens,
yn-medh an Arloedh.
Yeremia a Grodhvol Arta hag yw Koselhes
10Go-vy, ow mamm, ma'm omdhuges, gour a strif ha gour a gedrynn dhe oll an nor! Ny res vy prestenn, na ny brestis tus dhymmo vy: mes hwath peub anedha a'm millik. 11An Arloedh a leveris, Sur, my a'th tannvon dhe-ves rag dha les dha honan, devri my a wra dhe'n eskar pledya ragos yn termyn drogedh hag yn termyn galar. 12A yll horn terri horn an gogledh, ha brons?
13Dha gevoeth ha'th tresoryow a rov avel preydh heb kost, rag oll dha beghosow, dres oll dha diredh. 14Ha my a wra dhis servya dha eskerens yn tir na aswonnydh: rag tan yma enowys y'm sorr, hag a wra leski warnas.
Notes for verses 13–141 entry
Text notes
Jeremiah 15:14 a wra dhis servya: Amendys, ow siwya an Septuagint. View in passage
15A Arloedh, ty a woer:
porth kov ahanav, ha'm visitya,
ha'm diella war ow helghysi;
na'm deg vy dhe-ves y'th hirwodhevyans;
godhvydh a'th wovis jy my dhe wodhevel keredh.
16Dha eryow a veu kevys, ha my a's dybris:
ha'th heryow o lowender dhymm
ha heudhder ow holonn:
rag dha hanow re beu gelwys warnav,
A Arloedh, Duw an luyow.
17Ny esedhis yn kuntelles an re a wra ges,
na ny lowenhis;
my a esedhas ow honan drefenn dha leuv:
rag ty a'm lenwis a sorrvann.
18Prag yth yw ow dolor heb diwedh,
ha'm goli yw mar dhrog
ma na yll bos yaghhes?
A vydhydh dhymm yn tien avel gover gowek,
hag avel dowrow a fyll?
19Rakhenna yndellma y lever an Arloedh:
Mar tehwelydh, ena my a'th taskemmer,
ha ty a sev arta a-ragov:
ha mar leverydh an pyth yw drudh a-der an pyth yw divri,
ty a vydh avel leveryas ragov:
gas i dhe dhehweles dhiso jy,
mes ty na dhehwel dhedha i.
20Ha my a'th wra dhe'n bobel ma
fos kerys a vrons;
hag i a omladh er dha bynn,
mes ny yllons dha fetha,
rag my a vydh genes
dhe'th selwel ha'th telivra,
yn-medh an Arloedh.
21Ha my a'th telirv yn-mes a leuv a'n re dhrog,
ha my a'th taspren yn-mes a leuv turans.