Yeremia 14
An Syghor Bras
1Ger an Arloedh a dheuth dhe Yeremia a-dro dhe'n syghor:
2Yuda a alar,
divew yw hy yetow;
esedhys yns war an dor yn galarwisk;
ha kri Yerusalem res eth yn-bann.
3Aga ugheloryon re dhannvonas aga gwesyon rag dowr:
i a dheuth dhe'n dowrarghow,
ny gavons dowr;
i a dhehwelis gwag aga lestri;
methek ens ha konfondys,
hag a gudhas aga fenn.
4Drefenn bos krin an gweres
rag nyns esa glaw war an dor,
methek o an diogyon,
i a gudhas aga fenn.
5Ye, an ewik ynwedh a dhineythis y'n gwel, ha gasa hy askorr,
drefenn nag esa gwels.
6Ha'n asenes gwyls a sevis y'n ugheldiryow moel,
ow frikhwytha an gwyns avel owrgeun;
aga lagasow a fyllis,
drefenn nag esa losow.
7Kyn hwra agan drogoberow doen dustuni er agan pynn, A Arloedh,
gwra neppyth a-barth dha hanow;
rag agan dislelder yw meur;
ni re beghas er dha bynn.
8A wovenek Ysrael,
y selwador yn termyn ahwer,
prag y tal dhis bos avel alyon y'n tir,
hag avel tremenyas a dreyl a-denewen dhe spena an nos?
9Prag y fydhydh avel gour penndegys,
avel gour galloesek na yll sawya?
Mes yth esos yn agan mysk, A Arloedh,
ha dha hanow re beu gelwys warnan;
na wra agan gasa.
10Yndellma y lever an Arloedh dh'y bobel:
Yn hwir i re garas gwandra,
ny fronnsons aga threys,
yndella ny's degemmer an Arloedh;
lemmyn ev a wra perthi kov a'ga drogoberow,
ha kessydhya aga feghosow.
11Ena an Arloedh a leveris dhymm: Na wra pysi rag dader an bobel ma. 12Pan wrons penys, ny glewav aga kri; ha pan offrons offrynn leskys hag offrynn greun, ny's degemmerav: mes my a's distru der an kledha, ha gans an divoetter, ha gans an pla.
13Ena my a leveris, ‘A Arloedh Duw! Otta, an brofoesi a lever dhedha, “Ny welowgh an kledha, na hwath ny'gas beus divoetter; mes my a re dhywgh kres sur y'n tyller ma.” ’
14Ena an Arloedh a leveris dhymm: An brofoesi a brofoes gowyow y'm hanow vy: ny's dannvenis, na ny gorhemmynnis dhedha, na kewsel dhedha: i a brofoes dhywgh fals welesigeth ha koeg dhewinieth, ha toell aga holonn. 15Ytho yndellma y lever an Arloedh a-dro dhe'n brofoesi a brofoes y'm hanow vy, kyn na's dannvenis, mes hwath i a lever, ‘Ny vydh kledha na divoetter y'n tir ma’: Dre gledha ha divoetter y fydh distruys an brofoesi na. 16Ha'n bobel dhe neb y profoesons a vydh tewlys yn-mes yn stretow Yerusalem drefenn an divoetter ha'n kledha; ha ny vydh nagonan dh'aga ynkleudhyas, i, na'ga gwragedh, na'ga mebyon, na'ga myrghes: rag my a dhiver aga drogedh warnedha.
17Ytho ty a lever an ger ma dhedha:
Diveres ow lagas dagrow yn-nans nos ha dydh,
na hedhens:
rag an wyrghes, myrgh ow fobel, yw gweskys gans goli meur,
gans strekys pur ankensi.
18Mars av yn-rag dhe'n mes,
otta an re ledhys gans an kledha!
Ha mars av a-ji dhe'n sita,
otta an re yw klav gans divoetter.
Rag an profoes ha'n oferyas
re wandras dhe dir na wodhons.
An Bobel a Bled rag Truedh
19A wruss'ta denagha Yuda yn tien?
A wrug dha enev kasa Sion?
Prag y hwruss'ta agan gweskel
ma na vydh yaghheans dhyn?
Ni a hwilas kres mes nyns eus dader:
rag termyn yeghes, hag otta browagh.
20Ni a aswonn, A Arloedh, agan drogedh,
kammhynseth agan tasow,
rag ni re beghas er dha bynn.
21Na wra agan kasa, a-barth dha hanow;
na dhisenor tron dha wolewder;
porth kov, na dorr dha gevambos genen.
22Eus yn mysk idolyow an kenedhlow nebonan a yll gwruthyl glaw?
Po a yll an nevow aga honan ri kowasow?
A nyns yw ty, A Arloedh agan Duw?
Ytho yma agan govenek ynnos,
rag ty re wrug oll an traow ma.