Read the Bible

Ple'ma testenn torrva demmedhyans dha vamm,

gensi ma's gorris dhe-ves?

Po py a'm kresysoryon yw

dhodho ma'th werthis vy?

Otta, drefenn dha beghosow y feus gwerthys,

ha rag dha dreuspassow y feu dha vamm gorrys dhe-ves.

²Prag nag esa denvyth ena pan dheuth vy?

Prag na worthybis denvyth pan elwis vy?

Yw ow dorn berrhes bys ma na yll hi dasprena?

A nyns eus dhymmo vy galloes dhe dhelivra?

Gans ow heredh my a sygh an mor,

my a wra avonyow difeyth;

aga fuskes a fler rag difyk dowr,

hag a verow rag syghes.

³My a wisk an nevow yn tewlder,

ha gul yskar aga dillas.

⁴An Arloedh Duw re ros dhymm

taves an re yw dyskys,

rag may hwodhviv fatell sostenav

gans ger an den skwith.

Myttin ha myttin ev a dhifun,

ev a wra dhe'm skovarn difun

rag goslowes kepar ha'n re yw dyskys.

⁵An Arloedh Duw re igoras ow skovarn,

ha nyns en vy gorth,

ny dreylis war-dhelergh.

⁶My a ros ow heyn dhe'n re a'm gweskis,

ha'm diwvogh dhe'n re a dennas an varv yn-mes;

ny gudhis ow fas

dhiworth despit ha trew.

⁷An Arloedh Duw a'm gweres,

ytho ny veuv konfondys;

rakhenna my re settyas ow fas avel kellester,

ha my a wonn na borthav meth.

⁸Ogas yw ev neb a'm ewnha.

Piw a vynn strivya genev?

Sevyn ni war-barth.

Piw yw ow huhudhor?

Des e nes dhymm.

⁹An Arloedh Duw yth yw neb a'm gweres;

piw a lever ow bos kablus?

I oll a vydh usys avel kweth,

an goedhan a's deber.

¹⁰Piw yn aga mysk a berth own a'n Arloedh

hag yw gostyth dhe lev y was?

Ev neb a gerdh yn tewlder,

neb na'n jeves golow,

byttegyns ev a drest yn hanow an Arloedh,

ha poesa war y Dhuw.

¹¹Mes hwi oll yw gwrioryon tan,

neb a omwrogys gans yttewi.

Kerdhewgh yn flamm agas tan

hag yn mysk an yttewi re enowsowgh!

Hemm yw an pyth a'gas bydh a'm dorn:

Hwi a wrowedh yn tyller a dorment.