Read the Bible

¹Goslowewgh orthiv, ynysow,

klewewgh, A boblow, a bellder:

an Arloedh a'm gelwis dhiworth an dorr,

pan esen yn brys ow mamm ev a'm henwis.

²Ev a wrug ow ganow avel kledha lymm,

yn skeus y dhorn ev a'm kudhas;

ev a'm gwrug seth lymmys,

yn goen y sethow ev a'm kelas.

³Hag y leveris dhymm, ‘Ow gwas yth os,

Ysrael, may fydhav glorifiys ynno.’

⁴Mes my a leveris, ‘Yn euver re lavuris,

ha spena ow nerth rag travyth ha rag gwakter;

byttegyns yma ow gwirvreus gans an Arloedh,

ha'm pewas gans ow Duw.’

⁵Ha lemmyn an Arloedh a lever,

neb a'm formyas y'n dorr dhe vos y was,

dhe dhri Yakob tre dhodho,

ha may fo Ysrael kuntellys dhodho,

rag enorys yth ov yn golok an Arloedh,

ha'm Duw re dheuth ha bos ow nerth –

⁶yn-medh ev:

‘Tra re drufel ragos yw ty dhe vos ow gwas,

rag drehevel loethow Yakob,

ha dri arta an re withys a Ysrael.

My a'th re avel golow dhe'n kenedhlow,

rag mayth hettho ow selwyans dhe bennow an norvys.’

⁷Yndellma y lever an Arloedh,

Dasprenyas Ysrael, ha'y Sans,

dhodho ev neb yw dispresys fest yn town, kasadow dhe'n kenedhlow,

keth rewloryon:

‘Myghternedh a wel hag a sev,

ha pennsevigyon a ombleg dhe'n dor,

drefenn an Arloedh neb yw lel,

an Sans a Ysrael, neb re'th tewisas.’

⁸Yndellma y lever an Arloedh:

Y'n prys plegadow re worthybis dhis,

yn jydh selwyans re'th weresis;

my re'th withas, ha'th ri

avel kevambos dhe'n bobel,

rag fastya an tir,

rag kevrenna an ertajys ynyal,

⁹rag leverel dhe'n brisnoryon, ‘Dewgh yn-mes’,

dhe'n re usi yn tewlder, ‘Omdhiskwedhewgh!’

Peuri a wrons ryb an fordhow,

war oll an ugheldiryow moel y fydh aga feurva.

¹⁰Ny's tevydh na nown na syghes,

ny's gwask na toemmder na howl,

rag ev neb a gemmer truedh anedha a vynn aga hembronk,

ha ryb fentynyow dowr aga hevarwoedha.

¹¹Ha my a dreyl oll ow menydhyow dhe vos fordh,

ha'n fordhow-meur a vydh sevys yn-bann.

¹²Otta, an re ma a dheu a bellder,

hag otta, an re ma a'n gledhbarth, hag a'n howlsedhes,

ha'n re ma a bow Sinim.

¹³Kenewgh yn lowen, A nevow, ha kri gans joy, A norvys;

kenewgh yn lowen, A venydhyow!

Rag an Arloedh re gonfortyas y bobel,

ha kemmeres truedh a'y voghosogyon.

¹⁴Mes yn-medh Sion, ‘An Arloedh re'm forsakyas,

ow Arloedh re'm ankovas.’

¹⁵A yll benyn ankevi an flogh orth hy bronn?

po fyllel kemmeres truedh a vab hy thorr?

I ynwedh a yll ankevi,

mes my, ny'th ankovav.

¹⁶Otta, my re'th gravyas war balv ow dorn,

yma dha fosow pup-prys a-ragov.

¹⁷An re a'th tastrehav a ober moy buan es an re a'th tistruis,

an re a'th wastyas a gildenn a-dhiworthis.

¹⁸Drehav dha dhewlagas a-derdro ha gwel;

i oll a omguntell, i a dheu dhis.

Dell vewav, yn-medh an Arloedh,

ty a wra aga gwiska oll avel tegenn,

hag avel benyn bries ty a's kelm warnas.

¹⁹Rag dha vagoryow ha'th tylleryow gwag

ha'th tir gwastys a vydh re vyghan lemmyn rag dha drigoryon,

ha'n re a'th lonkas a vydh pell dhe-ves.

²⁰An fleghes a veu genys dhis yn termyn dha anvabeth

a lever hwath y'th tiwskovarn,

‘Re ynn yw an tyller ragov,

gwra spas dhymm, rag mayth annetthiv!’

²¹Ena ty a lever y'th kolonn,

‘Piw re dhineythis an re ma ragov?

My re gollas ow fleghes, hag anvap en,

divres ha gorrys dhe-ves;

ytho piw re vagas an re ma?

Otta, gesys veuv ow honan.

An re ma, a-ble teuthons?’

²²Yndellma y lever an Arloedh Duw:

Otta, my a dhrehav ow dorn dhe'n kenedhlow,

ha settya ow baner yn-bann dhe'n poblow;

i a dhre dha vebyon yn aga askra,

ha'th vyrghes a vydh degys war aga diwskoedh.

²³Myghternedh a vydh dha dasvethow,

ha'ga fennsevigesow a vydh dha vammvethow,

i a ombleg dhis ha'ga fas dhe'n dor,

ha lapya doust dha dreys.

Ena ty a woer my dhe vos an Arloedh;

an re a'm gorta, ny's tevydh meth.

²⁴A yllir kemmeres preydh a-dhiworth kasor,

po a yll kethyon turant bos sawys?

²⁵Mes yndellma y lever an Arloedh:

Kethyon a vydh kemmerys dhiworth breselyas hogen,

ha preydh turant a vydh sawys,

rag my a striv gans an re a striv orthis,

ha my a saw dha fleghes.

²⁶My a wra dhe'th waskoryon dybri aga hig aga honan,

ha gans aga goes aga honan y fydhons medhow, par dell ve gans gwin.

Ena pub kig oll a wodhvydh

my dhe vos an Arloedh, dha Selwador

ha'th Tasprenyas, an Galloesek a Yakob.