Read the Bible

¹Yndellma y lever an Arloedh dh'y untys, dhe Kyrus,

neb a synsis vy er y leuv dhyghow,

rag fetha kenedhlow a-ragdho,

ha dhe dhigelmi diwglun myghternedh,

dhe igeri darasow a-ragdho,

ha ny vydh yetys deges:

²Yth av a-ragos

ha levenhe an menydhyow;

my a derr an darasow a vrons,

ha treghi der an barrys a horn.

³My a re dhis tresoryow a dewlder,

ha rychys kudhys yn tylleryow kevrinek,

rag may hwodhvi yth yw my, an Arloedh,

Duw Ysrael, neb a'th elow orth dha hanow.

⁴A-barth ow gwas Yakob,

hag Ysrael, ow dewisys,

my a'th elow orth dha hanow,

my a re dhis les-hanow a enor, kyn na'm aswonnsys.

⁵My yw an Arloedh, ha nyns eus ken;

a-der my nyns eus duw;

my a'th arv, kyn na'm aswonnsys,

⁶rag may hwodhvons, dhiworth an howldrehevel

ha dhiworth an howlsedhes, nag eus nagonan a-der my,

my yw an Arloedh ha nyns eus ken.

⁷My a form golow ha kreatya tewlder,

my a wra kres ha kreatya galar,

my yw an Arloedh neb a wra oll an taklow ma.

⁸Dinewewgh, A nevow, a-wartha,

ha'n kommol, diverens ewnder;

bedhes an dor igerys, ha deges selwyans avel frut,

hag egines ewnder war-barth ganso.

My, an Arloedh re'n kreatyas.

⁹Go-ev neb a striv orth y Wrier,

priweyth orth an priweythor!

A lever an pri dh'y formyer, ‘Pandr'a wredh?’

po ‘Nyns eus skovornow dhe'th ober’?

¹⁰Go-ev neb a lever dhe das: ‘Pandr'a dhineythydh?’

po dhe venyn, ‘Pandr'a dhegedh y'th lavur?’

¹¹Yndellma y lever an Arloedh,

an Sans a Ysrael ha'y formyer:

A wovynnowgh orthiv a-dro dhe'm fleghes,

po ow erghi a-dro dhe ober ow diwla?

¹²My yw neb a wrug an norvys,

ha my a greatyas mab-den warnodho;

ow diwla y feu a lesas an nevow,

ha my a worhemmynnis aga luyow oll.

¹³My a wrug dhodho difuna yn ewnder,

ha my a wra oll y fordhow kompes.

Ev a dhrehav ow sita,

ha delivra ow divresow,

a-der a wober nag a bewas,

yn-medh Arloedh an luyow.

¹⁴Yndellma y lever an Arloedh:

Gwayn lavur Ejyp ha gwara Ethiopia,

ha pobel Sabea, gwer meur aga ughelder,

a dheu dhis, ha bos dhis;

i a hol war dha lergh ow tos dhis yn kadonyow.

I a ombleg dhe'n dor a-ragos, ha pysi dhis, ow leverel,

‘Yma Duw genes yn sur, ha nyns eus nahen,

nyns eus duwow saw ev.’

¹⁵Yn hwir ty yw Duw a omgudh,

A Dhuw Ysrael, an Selwador.

¹⁶I oll a's teves meth hag a vydh konfondys,

gwrioryon imajys a yn deray war-barth.

¹⁷Mes Ysrael a vydh selwys y'n Arloedh

gans selwyans heb diwedh,

ny'gas bydh meth na ny vydhowgh konfondys

bys vykken.

¹⁸Rag yndellma y lever an Arloedh,

Kreador an nevow,

Duw yw ev;

ev a formyas an norvys ha'y wruthyl;

ev a'n fastyas,

ny'n kreatyas dhe vos gwag,

ev a'n formyas dhe vos annedhys:

My yw an Arloedh, nyns eus arall.

¹⁹Ny gewsis vy yn-dann gel,

yn tyller tewl a'n norvys.

Ny leveris dhe agh Yakob,

‘Hwilewgh my yn euver.’

My, an Arloedh a gews an gwir;

my a dheriv an pyth yw ewn.

²⁰Omguntellewgh ha dewgh,

dewgh nes war-barth, hwi fowesigyon a'n kenedhlow!

Ny's teves godhvos vyth,

an re a dheg aga imajys a brenn,

hag i a bys dhe dhuw na'n jeves selwel.

²¹Dyllewgh ha profyewgh agas ken;

omgusulyens i war-barth.

Piw a dharleveris hemma nans yw pell?

Piw a'n dellos seuladhydh?

A nyns o my, an Arloedh?

Nyns eus Duw a-der my,

Duw gwiryon ha Selwador,

nyns eus nagonan a-der my.

²²Treylyewgh dhymm ha bedhewgh selwys,

oll pennow a'n norvys;

rag my yw Duw ha nyns eus ken.

²³My re dos ren ow honan,

dhiworth ow ganow gallas yn ewnder

ger na dhehwel:

‘Dhymmo vy y hwra plegya pub glin,

pub taves a wra ti.’

²⁴A-dro dhymmo vy y leverir,

nag eus ewnder na nerth saw unnsel y'n Arloedh.

Bys dhodho y teu gans meth

peub a'n jevo sorr orto.

²⁵Y'n Arloedh y fydh ewnheans ha bostyans

dhe oll an has a Ysrael.