Ysay 44
Bennath Duw war Ysrael
1Mes klew lemmyn, A Yakob, ow gwas,
hag Ysrael neb re dhewisis!
2Yndellma y lever an Arloedh a'th wrug,
neb a'th formyas a'n dorr, hag a wra dha weres:
Na borth own, a Yakob, ow gwas,
Yeshurun neb re dhewisis.
3Rag my a dhinwa dowr war an syghtir,
ha stredhow war an dor krin;
ha my a dhinwa ow spyrys war dha has,
hag ow bennath war dha agh.
4Hag i a dyv kepar dell vens yn mysk gwels,
avel helyk ryb stredhow dowr.
5Hemma a lever, ‘Dhe'n Arloedh yth ov’,
y gila a vydh gelwys gans hanow Yakob,
hag onan arall a vynn skrifa war y leuv, ‘Dhe'n Arloedh ’
ha kemmeres an hanow a enor ‘Ysrael’.
6Yndellma y lever an Arloedh, Myghtern Ysrael,
ha'y Dhasprenyas, Arloedh an luyow:
My yw an kynsa ha my yw an diwettha,
hag a-der my nyns eus duw.
7Piw yw haval dhymm? Dylles ev,
meneges ev ha'y dhiskwedhes dhymm.
Piw yw re dharleveris an taklow a dheu?
Leverens dhyn an pyth yw hwath dhe dhos.
8Na berthewgh own, bedhewgh diagha!
A ny dharleveris dhis seuladhydh ha'y veneges?
Hwi yw ow dustuniow.
Eus Duw a-der my?
Nyns eus karrek, ny aswonnav kammenn.
Notes for verses 6–82 entries
Text notes
Isaiah 44:7 Piw yw re dharleveris an taklow a dheu: Amendys. Ebrow A-ban apoyntis vy pobel goth, ha'n taklow a dheu. View in passage
Isaiah 44:7 Leverens dhyn an pyth yw hwath dhe dhos: Amendys. Ebrow Ha'n taklow a dheu gwrens i deklarya ragdha i aga honan. View in passage
Follneth Gordhyans Idolys
9Oll myns a wra imajys yw mann, ha'n taklow may lowenhons ynna yw diles. Aga dustunioryon yw heb gweles ha heb godhvos, ytho i a berth meth. 10Piw re wrug duw po teudhi imaj gravys na'n jeves les kammenn? 11Otta, oll y hynsa a's tevydh meth, ha nyns yw an greftoryon marnas tus; omguntellens i oll, sevens yn-rag; i a vydh ownek, i a berth meth war-barth.
12An gov a gemmer toul, hag oberi ganso war regydh, ha shapya imaj gans mortholow, ha'y wul gans nerth y vregh; dhodho yma nown ha'y nerth a fyll, ny yv dowr, hag ev a glamder. 13An ser prenn a ystynn kordenn-vusura, ev a'n merk gans mynowes, ev a'n shap gans raskow hag a'n merk gans kompas; ev a'n shap dhe hevelep gour, gans tekter den, may trikko yn chi. 14Ev a dregh sedres, hag a dhewis glastanenn po derwenn ha gasa dhedhi tevi krev yn mysk gwydh an koes; ev a blans lowrwydhenn ha'n glaw a's mag. 15Ena y teu ha bos keunys rag den. Ev a gemmer rann anedha hag a omdoemm; ev a enow tan hag a beb bara; ynwedh y hwra duw ha'y wordhya, ev a wra imaj gravys hag a goedh dhe'n dor a-ragdho. 16Hanter anodho ev a lesk yn tan; a-ugh an hanter ma ev a rost kig ha'y dhybri, ha lenwys yw; ynwedh ev a omdoemm hag a lever, ‘Aha, toemm ov, my re welas an tan!’ 17A'n remenant arall ev a wra duw, y imaj, ha koedha dhe'n dor a-ragdho ha'y wordhya; ev a bys dhodho hag a lever, ‘Delirv vy, rag ty yw ow duw.’
18Ny wodhons, na ny gonvedhons; rag aga dewlagas yw drogurys bys ma na welons, ha'ga holonn bys ma na gonvedhons. 19Ny breder nagonan yn y golonn, na nyns eus godhvos na konvedhes dhe leverel, ‘Hanter anodho re loskas y'n tan, ynwedh my a bebis bara war y regydh, my a rostyas kig ha dybri. A wrav vy tra gasadow a'y remenant? A wrav vy koedha dhe'n dor a-rag stokk a brenn?’ 20Ev a beur war lusu, kolonn doellys re'n kammhembronkas, ha ny'n jeves delivra y enev na leverel, ‘A nyns eus gow y'm leuv dhyghow?’
Nyns yw Ysrael Ankevys
21Porth kov a'n re ma, A Yakob,
hag Ysrael, rag ty yw ow gwas;
my a'th formyas, ty yw ow gwas;
A Ysrael, ny vydhydh ankevys genev.
22My re skubas dhe-ves dha dreuspassow avel kommolenn,
ha'th peghosow avel niwl;
dehwel dhymm, rag my re'th tasprenas.
23Kenewgh, A nevow, rag an Arloedh re'n gwrug,
germewgh, A dhownderyow an norvys;
germewgh gans joy, A venydhyow,
An goeswik ha pub gwydhenn eus ynno!
Rag an Arloedh re dhasprenas Yakob,
hag ev a vydh glorifiys yn Ysrael.
24Yndellma y lever an Arloedh, dha Dhasprenyas,
neb a'th formyas y'n dorr:
My yw an Arloedh, a wrug pup-tra,
neb a ystynnas an nevow ow honan,
hag a lesas an norvys ow honan;
25neb a lett toknys oferysi-dhargan,
hag a wra ges a goelyogyon;
neb a dreyl tus fur war-dhelergh,
ha gul foll aga godhvos;
26neb a surha ger y was,
hag a gowlwra kusul y gannasow;
neb a gews a Yerusalem, ‘Hi a vydh annedhys’,
hag a-dro dhe sitys Yuda, ‘I a vydh drehevys,
ha my a dhastrehav aga magoryow’;
27neb a lever dhe'n keynvor, ‘Bydh sygh!
ha my a sygh agas avonyow’;
28neb a gews a Kyrus, ‘Ow bugel yw ev,
hag ev a gollenow ow forpos oll’;
ow leverel a-dro dhe Yerusalem, ‘Bedhes dastrehevys’,
hag a-dro dhe'n tempel, ‘Bedhes hy selven desedhys yn y le.’