Ysay 4
1Seyth benyn a gyv dalghenn yn unn wour y'n jydh na, ow leverel, ‘Ni a dheber agan bara ha gwiska agan dillas agan honan; unnsel gas ni dhe vos henwys gans dha hanow. Kemmer dhe-ves agan sham!’
Glori ow Tos dhe Remenant Sion
2Y'n jydh na egin an Arloedh a vydh teg ha gloryus, ha frut an tir a vydh bryntin ha splann dhe'n re a dhienk yn Ysrael. 3Ev neb a vydh gesys yn Sion, neb a worta yn Yerusalem, a vydh henwys sans, pubonan neb a veu skrifys rag bewnans yn Yerusalem, 4wosa an Arloedh dhe wolghi dhe-ves kawgh myrghes Sion, ha glanhe goes Yerusalem yn-mes anedhi dre spyrys breus ha spyrys loskvann. 5Ena an Arloedh a wra kreatya war an tyller kowal a venydh Sion, ha war hy huntellvaow, kommol ha mog dydhweyth ha golow tan ow flammya nosweyth; rag dres oll an glori y fydh nenlenn. 6Hi a vydh goskes dhe woskeusi rag syghor dydhweyth, ha skovva ha kudh rag tewedh ha glaw.