Read the Bible

¹An gwylvos ha'n tir sygh a vydh heudh,

ha'n difeythtir a lowenha ha bleujyowa;

avel an safron pras ²ev a vleujyow,

ha lowenha gans heudh ha kana.

Glori Lebanon a vydh res dhodho,

splannder Karmel ha Sharon;

i a wel glori an Arloedh,

splannder agan Duw.

³Nerthewgh an dhiwleuv ydhil

ha krevhewgh an dhewlin wann.

⁴Leverewgh dhe'n re gans kolonn brederus,

‘Bedhewgh krev, na berthewgh own;

otta, agas Duw a dheu gans dial,

gans attal duwel.

Ev a dheu ha'gas sawya.’

⁵Ena dewlagas an dhellyon a vydh igerys,

ha diwskovarn an re vodhar a glew.

⁶Ena an evredhek a lamm avel karow,

ha taves an den avlavar a gan yn lowen.

Rag dowr a derr yn-mes y'n gwylvos,

ha goverow y'n difeythtir.

⁷An tir poeth a vydh poll kors,

ha'n tir sygh a vydh fentynyow dowr.

Y'n tyller mayth esa owrgeun ow krowedha,

an gwels a vydh kors ha papyrus.

⁸Y fydh fordh-veur ena, ha hyns,

hag y fydh henwys an Fordh a Sansoleth.

Ny dremen an den avlan warnedhi,

mes y fydh fordh rag pergherinyon,

ny wra fellyon gwandra ynni.

⁹Ny vydh lew ena,

ha ny yskynn best gwyls warnedhi ow preydha;

ny vydhons kevys ena,

mes an re dhasprenys a gerdh ena.

¹⁰An re dasprenys a'n Arloedh a dhehwel,

ha dos dhe Sion gans kana,

ha joy heb diwedh a vydh war aga fenn.

I a's tevydh lowena ha joy,

ha tristyns ha hanasa a fi dhe'n fo.