Read the Bible

¹Dewgh nes, hwi genedhlow, dhe glewes,

ha hwi boblow, goslowewgh;

klewes an nor ha pup-tra eus ynno,

an norvys hag oll y askorr.

²Rag yma sorrvann dhe'n Arloedh erbynn oll an kenedhlow,

ha konnar erbynn oll aga luyow.

Ev re's distruis

ha'ga ri dhe ladhva.

³Aga re ledhys a vydh tewlys yn-mes,

ha'ga fler a yskynn dhiworth aga horfow;

aga goes a res war an menydhyow.

⁴Oll lu nev a wra pedri,

ha'n ebron a vydh rolys avel rol-skrifa;

oll aga lu a wedher

dell wedher delenn dhiworth gwinbrenn,

dell wedher figys dhiworth figbrenn.

⁵Rag ow kledha re evas y walgh yn nev;

otta, ev a dhiyskynn war Edom,

ha war bobel a wrugavy aga sakra rag breus.

⁶Yma dhe'n Arloedh kledha; lenwys yw a woes,

gwalghys yw a vlonek,

a woes eyn ha gever,

a vlonek diwloneth hordhes;

drefenn bos sakrifis dhe'n Arloedh yn Bosra

ha ladhva vras yn pow Edom.

⁷Bualyon a goedh gansa,

ha lodhnow gans terewi.

Aga thir a yv goes lowr,

ha'ga doust a vydh gwlyghys a vlonek.

⁸Ytho yma dhe'n Arloedh dydh dial,

blydhen attal rag mentena ken Sion.

⁹Goverow Edom a vydh treylys dhe byg,

hy doust dhe loskven,

ha'y thir dhe byg loskvann.

¹⁰Ny vydh difeudhys nos na dydh;

hy mog a yskynn bys vykken.

Hi a vydh magor a henedh dhe henedh;

nagonan ny dremen dresti trank heb worfenn.

¹¹An oula kornek ha'n klabytter a's erit,

ha'n ibis ha'n vran-vras a drig ynni.

Ev a ystynn warnedhi an gordenn a dheray

ha'n plemmik a dhistruyans.

¹²Hy ugheloryon ny's tevydh travyth ena a yllir y elwel ruvaneth,

hag oll hy fennsevigyon a vydh mann.

¹³Spern a dyv dres hy falesyow,

askall ha spedhas yn hy hastylli.

Hi a vydh peurva owrgeun,

ha trigva rag strusyow.

¹⁴Goedhviles a vet gans owrgeun,

ha boghes a elow an eyl dh'y gila;

ena ynwedh an churrys nos a dhehwel

ha kavoes dhedha powesva.

¹⁵An oula a neyth ena ha dedhwi

ha gori ha kreuni yn-dann hy skeus;

ena falghunes a omguntell

pubonan gans hy hespar.

¹⁶Hwithrewgh yn lyver an Arloedh ha lennewgh:

ny fyll nagonan anedha,

ny vydh nagonan heb hy hespar.

Rag y anow re worhemmynnis,

ha'y Spyrys a's kuntell war-barth.

¹⁷Ev a dewl prenn ragdha,

ha'y leuv a's rann gans kordenn-vusura.

I a's erit bys vykken,

ha triga ynni a henedh dhe henedh.