Ffrwythau’r Ysbryd Glân: 5 : Caredigrwydd

Ffrwyth nesaf yn ein cyfres am ffrwythau’r Ysbryd Glân ydy χρηστότης (chrestotes): caredigrwydd. (Gal 5.22) Dydy’r gair yma, neu hyd yn oed y gair χρηστός (chrestos: caredig) ddim yn ymddangos llawer o weithiau yn y Testament Newydd, ond mae defnydd y gair yno yn dangos tri pheth pwysig am garedigrwydd:

Mae caredigrwydd yn agwedd o gymeriad Duw:

Mae fy iau i yn gyfforddus (χρηστός) a dw i ddim yn gosod beichiau trwm ar bobl. (Mat 11.30 beibl.net)

Does dim byd tebyg yn unman i'r caredigrwydd ddangosodd aton ni drwy beth wnaeth y Meseia Iesu. (Eff 2.7, beibl.net)

Mae hefyd yn agwedd o’n tystiolaeth at Dduw:

Bydd hi'n amlwg eich bod yn blant i'r Duw Goruchaf, am mai dyna'r math o beth mae e'n ei wneud – mae'n garedig (χρηστός)  i bobl anniolchgar a drwg. (Luc 6.35, beibl.net)

Mae gynnon ni ddewis i fod yn garedig neu ddim:

Mae Duw wedi'ch dewis chi iddo'i hun ac wedi'ch caru chi'n fawr, felly dangoswch chithau dosturi at bobl eraill, a bod yn garedig, yn ostyngedig, yn addfwyn ac yn amyneddgar. (Col 3.12, beibl.net)

Ffrwyth yr Ysbryd Glân ydy caredigrwydd – ac mae’r ffrwyth yn tyfu wrth i ni edrych ar ein Duw caredig a phan rydym ni’n dewis i fod yn garedig i bobl o ddydd i ddydd.

• Pa gyfleoedd sy’ gynnoch chi’r wythnos yma i fod yn garedig i’r bobl nad ydych yn eu gweld o ddydd i ddydd?
• Beth am wneud ‘random act of kindness’ i ddieithryn?

Rhannwch eich profiad efo ffrind neu ar dudalen Facebook Beibl Byw

Christine Daniel
Mae Byw y Beibl  yn brosiect ar y cyd rhwng Cymdeithas y Beibl, Y Cyngor Ysgolion Sul a Gobaith i Gymru

Gallwch ddarllen mwy o flog Byw y Beibl yma