Arian

Mae’r Beibl yn cydnabod bod arian yn beth arwyddocaol yn ein bywydau. Roedd aur, arian a phres mor bwysig yn amser Abraham ag yr oedd yn amser Paul a’r apostolion. Mae’n dal i fod yn bwysig i ni heddiw.

Roedd pobl y Beibl yn defnyddio arian yn yr un modd â ni: prynu bwyd; talu trethi; rhoi rhoddion; adeiladu tai. Mi wnaethon nhw ddefnyddio eu cyfoeth i ddangos nerth a phwysigrwydd, adeiladu llefydd addoli, a gwneud eilunod. Mae’r Beibl yn rhoi sawl enghraifft o’r ffyrdd mae arian wedi dyfod yn hanfodol ym mywydau pawb bob dydd. Mae hefyd yn ymddangos bod yna bobl cyfoethog a phobl dlawd ers talwm, fel y mae heddiw. Cofiwch eiriau’r Iesu:

Bydd pobl dlawd o gwmpas bob amser, a gallwch eu helpu nhw unrhyw bryd (Marc 14:7)

Yn ôl y Beibl, tydi arian ei hun ddim yn beth da, neu’n beth drwg. Ond mi fedrwn ni feddwl am arian mewn ffyrdd anghywir ac mi fedrwn ni gamddefnyddio arian hefyd.

Er bod y Beibl yn dangos bod arian wedi bod yn beth pwysig ym mywydau pawb erioed, mae hefyd yn dweud nad yw mor bwysig â Duw ei hun nag â doethineb neu air Duw:

Yr ARGLWYDD sydd piau popeth wedi ei wneud o arian neu aur, pres neu haearn (Josua 6:19)

Y fath fendith sydd i'r sawl sy'n darganfod doethineb, ac yn llwyddo i ddeall. Mae'n gwneud mwy o elw nag arian, ac yn talu'n ôl lawer mwy nag aur. (Diarhebion 3:13-14)

Mae beth rwyt ti’n ei ddysgu yn fwy gwerthfawr na miloedd o ddarnau arian ac aur (Salm 119:72)

Yn y diwedd, ni fedrai dim byd neu neb ond Duw ei hun ein hachub ni:

Fydd arian ac aur ddim yn eu harbed nhw ar y diwrnod pan fydd yr ARGLWYDD yn barnu (Seff. 1:18)

• Beth ydy pwysigrwydd arian yn eich bywyd?
• Pa mor aml ydych chi’n defnyddio arian bob wythnos? A pha mor aml ydych chi’n cydnabod Duw a’i le yn eich bywyd trwy’r wythnos?

Wythnos nesaf, mi fyddwn ni’n ystyried be’ mae’r Beibl yn ei ddweud am ddefnyddio ein harian.

Gallwch ddarllen mwy o flog Byw y Beibl yma

Christine Daniel
Mae Byw y Beibl  yn brosiect ar y cyd rhwng Cymdeithas y Beibl, Y Cyngor Ysgolion Sul a Gobaith i Gymru