Online Bible

Read the Bible

Version
Book
Chapter

Psalmyn 94

PSALM 94

1O Hiarn Yee, dhyt’s ta bentyn dy ghoaill kerraghey: uss Yee, dhyt’s ta kerraghey bentyn, jean oo hene y hoilshaghey.

2Trog ort, uss Vriw y theihll: as jean ny mooaralee y chooilleeney lurg nyn doilchin.

3Hiarn, caïd nee ny mee-chrauee: caïd nee yn vooinjer vee-chrauee boggyssagh?

4Caïd nee ooilley ny drogh-yantee loayrt cha mooaralagh: as goaill orroo lheid y voggyssagh voyrnagh?

5T’ad bwoalley sheese dty phobble, O Hiarn: as jannoo tranlaase er dt’eiraght.

6T’ad dunverys y ven-treoghe, as y joarree: as cur y lhiannoo gyn ayr dy baase.

7As foast t’ad gra, Cha n’aggle dooin, cha jean y Chiarn fakin: chamoo ver Jee Yacob geill da.

8Gow-jee tastey, shiuish vee-hushtee mastey’n pobble: O shiuish ommydanyn, cuin nee shiu toiggal?

9Eshyn ren y chleaysh y hoiaghey, nagh jean eh clashtyn: ny eshyn ren y thooill, nagh jean eh fakin?

10Ny eshyn ta cummal seose ny ashoonyn: she eshyn ta gynsaghey da dooinney tushtey, nagh jean eshyn kerraghey?

11Ta fys ec y Chiarn er smooinaghtyn dooinney: nagh vel ad agh fardail.

12Bannit yn dooinney t’ou dy smaghtaghey, O Hiarn: as dy ynsaghey ayns dty leigh;

13Dy vod oo surranse y choyrt da ayns earish seaghyn: derrey vees yn ooig er ny chleiy son ny mee-chrauee.

14Son cha jean y Chiarn failleil e phobble: chamoo nee eh treigeil e eiraght;

15Derrey hyndaa-ys cairys reesht gys briwnys: nee adsyn ooilley ta firrinagh ayns cree geiyrt er.

16Quoi nee girree seose mârym noi ny mee-chrauee: ny quoi hassys er my heu noi ny drogh-yantee?

17Mannagh beagh y Chiarn er chooney lhiam: cha row saase my chour nagh beagh m’annym er ny choyrt ny host.

18Agh tra dooyrt mee, Ta my chass er skyrraghtyn: ren dty vyghin’s, O Hiarn, mish y chummal seose.

19Ayns ymmodee ny smooinaghtyn trimshagh v’aym ayns my chree: ta dty gherjagh er ooraghey m’annym.

20Bee veg ayd’s dy yannoo rish y stoyl-briwnys dy vee-chairys: ta cummey yn aggair myr y leigh?

21T’ad chaglym cooidjagh noi annym y dooinney cairagh: as deyrey gys baase yn uill neu-chyndagh.

22Agh yn Chiarn my chemmyrk: as my Yee niart my hreishteil.

23Cooilleenee eh orroosyn nyn olkys, as stroie-ee eh ad ayns y ghoanlys oc hene: dy jarroo, nee’n Chiarn yn Jee ain ad y stroie.