Online Bible

Read the Bible

Version
Book
Chapter

Psalmyn 48

PSALM 48

1Mooar ta’n Chiarn, as dy ard dy v’er ny voylley: ayns ard-valley yn Jee ain, dy jarroo er e chronk chasherick.

2Ta cronk Sion ynnyd aalin, as boggey yn seihll ooilley: er y cheu twoaie ta ard-valley yn ree mooar; te ry-akin dy vel Jee ayns ny plaaseyn eck myr kemmyrk shickyr.

3Son cur-my-ner, ta reeaghyn y thallooin: er nyn jaglym, as er n’gholl shaghey cooidjagh.

4Ghow ad yindys dy akin lheid ny reddyn; v’ad lhieent lesh atchim, as ayns y tullogh chaill ad nyn gree.

5Haink aggle orroo, as trimshey: myr er ben er-troailt.

6Nee uss brishey lhongyn ny marrey: lesh y gheay-niar.

7Myr ta shin er chlashtyn, myr shen ta shin er vakin ayns ard-valley yn Chiarn dy heshaght-chaggee flaunys, ayns ard-valley yn Jee ain: ta Jee dy chummal eh seose son dy bragh.

8Ta shin farkiaght er dty chenjallys-ghraihagh, O Yee: ayns mean dty hiamble.

9O Yee, myr ta dt’ennym, myr shen ta dty voylley gys king y theihll: ta dty laue yesh lane dy chairys.

10Lhig da’n cronk Sion goaill boggey, as inneen Yudah ve gennal: er coontey dty vriwnyssyn.

11Shooill-jee mysh Sion, as immee-jee mygeayrt-y-mooee: as gow-jee coontey ny tooryn eck.

12Gow-jee tastey vie jeh ny voallaghyn lajer eck, soie-jee seose ny thieyn eck: dy vod shiu ginsh dauesyn hig nyn yeï.

13Son she’n Jee shoh yn Jee ain son dy bragh as dy bragh: eshyn vees y leeideilagh ain gys laa nyn maaish.