Online Bible

Read the Bible

Version
Book
Chapter

Psalmyn 34

PSALM 34

1Ver-yms dy kinjagh booise da’n Chiarn: bee e voylley dy bragh ayns my veeal.

2Bee m’annym boggyssagh ayns y Chiarn: nee’n sleih imlee clashtyn jeh shen, as bee ad gennal.

3O moylley-jee yn Chiarn mârym: as lhig dooin ard-voylley ’choyrt da’n Ennym echey ry-cheilley.

4Hir mee yn Chiarn ayns padjer, as cheayll eh mee: as ren eh m’y livrey veih ooilley my aggle.

5Yeeagh ad seose huggey, as hooar ad soilshey: as cha row ny eddinyn oc naaragh.

6Cur-my-ner, ta’n boght geamagh, as ta’n Chiarn clashtyn eh: dy jarroo, as t’eh sauail eh ass ooilley e heaghyn.

7Ta ainle y Chiarn freayll arrey mygeayrt-y-moosyn ta goaill aggle roish: as dy livrey ad.

8O blasht-jee, as jeeagh-jee, cre cha graysoil ta’n Chiarn: bannit yn dooinney ta coyrt e varrant ersyn.

9O gow-jee aggle roish y Chiarn, shiuish e nooghyn: son adsyn ta goaill aggle roish cha bee nhee dy laccal orroo.

10Ta ny lionyn ayns feme, as gennaghtyn accyrys: agh adsyn ta shirrey yn Chiarn, cha bee ad laccal nhee erbee dy vel mie.

11Tar-jee, shiuish chloan, as eaisht-jee rhym: ynsee-yms diu aggle y Chiarn.

12Quoi’n dooinney eh ta aignagh dy ve beayn: as baillish laghyn mie y akin?

13Smaght dty hengey veih olk: as dty veillyn nagh loayr ad foalsaght erbee.

14Shaghyn dagh olk, as jean dy mie: shir lurg shee, as cur eh er y hoshiaght.

15Ta sooillyn y Chiarn harrish y sleih cairal: as ta ny cleayshyn echey foshlit gys nyn badjeryn.

16Ta eddin y Chiarn noi ocsyn ta jannoo olk: dy chur ass ny fraueyn yn chooinaghtyn oc veih eaghtyr y thallooin.

17Ta’n sleih cairagh jannoo aghin, as ta’n Chiarn cur clashtyn daue: as dy livrey ad ass ooilley nyn seaghyn.

18Ta’n Chiarn er-gerrey dauesyn ta jeh cree brisht: as sauee eh nyn lheid as ta jeh spyrryd imlee.

19S’mooar ta seaghyn y fer-cairal: agh ta’n Chiarn cur feaysley da assdoo ooilley.

20T’eh coadey ooilley e chraueyn: myr shen cha vel unnane jeu er ny vrishey.

21Agh nee lhag-haghyrt stroie ny mee-chrauee: as adsyn ta cur dwoaie da’n sleih ynrick, hig y chragh orroo.

22Ta’n Chiarn cur feaysley da anmeenyn e harvaantyn: as adsyn ooilley ta cur nyn marrant ersyn, cha bee ad er nyn dreigeil.