Online Bible

Read the Bible

Version
Book
Chapter

Psalmyn 20

PSALM 20

1Dy jean y Chiarn dty chlashtyn ayns y laa dy heaghyn: dy jean Ennym Jee Yacob dt’endeil.

2Dy der eh cooney hood veih’n ynnyd casherick: as dy jean eh dty niartaghey magh ass Sion.

3Dy gooinee eh er ooilley dty hebballyn: as soiaghey jeh dty ourallyn-losht.

4Dy der eh dhyt yeearree dty chree: as ooilley dt’aigney ’chooilleeney.

5Gow mayd boggey ayns dty haualtys, as barriaght y gheddyn ayns Ennym y Chiarn y Jee ain: dy gooilleen y Chiarn ooilley dty aghinyn.

6Nish ta fys aym, dy vel y Chiarn cooney lesh e Er-ooilit, as dy der eh clashtyn da veih e niau chasherick: dy jarroo lesh troshid slayntoil e laue yesh.

7Ta paart coyrt nyn marrant gys fainaghyn, as paart gys cabbil: agh nee shinyn cooinaghtyn er Ennym y Chiarn, y Jee ain.

8T’adsyn er nyn goyrt fo-chosh, as er duittym: agh ta shinyn er droggal, as shassoo dy shickyr.

9Saue shin, Hiarn, as clasht rooin, O Ree flaunys: tra ta shin geamagh ort.