Online Bible

Read the Bible

Version
Book
Chapter

Psalmyn 146

PSALM 146

1Jean y Chiarn y voylley, O m’annym; choud as s’bio mee ver-ym moylley da’n Chiarn: dy jarroo, choud as vee’m er-mayrn, goym arraneyn-moyllee gys my Yee.

2O ny cur-jee nyn marrant er princeyn, ny er veg jeh cloan gheiney: son cha vel veg y chooney ayndoo.

3Son tra ta ennal dooinney er n’gholl voish, nee eh chyndaa reesht gys e ooir: as eisht ta ooilley e chiarail goll naardey.

4Bannit t’eshyn ta Jee Yacob echey son e chooney: as e hreishteil t’ayns y Chiarn e Yee;

5Ta er chroo niau as thalloo, yn faarkey, as ooilley ny t’ayndoo: ta freayll e yialdyn son dy bragh;

6Ta jannoo cairys dauesyn ta surranse aggair: ta beaghey ny accryssee.

7Ta’n Chiarn coyrt feaysley da ny pryssoonee: ta’n Chiarn coyrt soilshey da ny doail.

8Ta’n Chiarn cooney lhieusyn t’er duittym: ta’n Chiarn goaill kiarail jeh’n vooinjer chairagh.

9Ta’n Chiarn coadey yn joarree, t’eh shassoo ayns lieh yn lhiannoo gyn ayr, as y ven-treoghe: agh son raad ny mee-chrauee, t’eh dy hilgey eh bun-ry-skyn.

10Bee yn Chiarn dty Yee, O Sion, ny Ree er son dy bragh: as trooid magh dy chooilley heeloghe.