Online Bible

Read the Bible

Version
Book
Chapter

Psalmyn 144

PSALM 144

1Bannit dy row yn Chiarn my niart: ta gynsaghey my laueyn dy chaggey, as my veïr dy ghleck;

2My varrant as my hoor lajer, my chashtal as m’er-livreyee, my endeilagh ayn ta mee treishteil: ta smaghtaghey yn pobble ta fo my reill.

3Hiarn, cre ta dooinney, dy vel oo coyrt lheid y gheill da: ny mac dooinney, dy vel oo jannoo wheesh jeh?

4Cha vel dooinney agh myr red gyn veg: ta e hraa goll shaghey myr y scadoo.

5Croym dty niaughyn, O Hiarn, as tar neose: benn rish ny sleityn, as bee ad ayns jaagh.

6Tilg magh dty hendreilyn, as skeayl ad: lhig magh dty hideyn, as stroie ad.

7Sheeyn magh dty laue veih’n yrjid: livrey mee, as saue mee, veih ny ushtaghyn mooarey, veih laue cloan yoarree;

8Yn beeal oc ta loayrt dy foalsey: as ta’n laue yesh oc laue yesh dy volteyrys.

9Goym’s arrane-moyllee noa hood’s, O Yee: as hood’s nee’m kiaulleeaght er lute dy yeih strengyn.

10T’ou uss er choyrt barriaght da reeaghyn: as er livrey David dty harvaant veih gaue yn chliwe.

11Saue as livrey mee veih laue cloan yoarree: yn beeal oc ta loayrt dy foalsey, as ta’n laue yesh oc laue yesh dy volteyrys.

12Dy vod ny mec ainyn gaase seose myr ny biljyn aegey: as dy vod ny inneenyn ain ’ve myr corneilyn aalin y chiamble;

13Dy vod ny thieyn-tashtee ain ’ve lane, as jeant magh dy palchey lesh dy chooilley horch dy stoyr: dy vod ny kirree ain bishaghey gys thousaneyn as jeih thousaneyn ayns nyn oayll;

14Dy vod ny dew ain ’ve lajer son obbyr, nagh bee assee erbee: ny veg y chappeeys, ny oyr gaccan ayns nyn straidyn.

15S’maynrey yn pobble ta ’sy stayd shoh: dy jarroo, bannit ta’n pobble ta’n Chiarn oc son nyn Yee.