Online Bible

Read the Bible

Version
Book
Chapter

Psalmyn 135

PSALM 135

1O moylley-jee yn Chiarn, cur-jee ard-voylley da Ennym y Chiarn: jean-jee eh y voylley, O shiuish shirveishee yn Chiarn;

2Shiuish ta shassoo ayns thie yn Chiarn: ayns cooyrtyn thie yn Jee ain.

3O moylley-jee yn Chiarn, son ta’n Chiarn graysoil: O trog-jee arraneyn-moyllee gys yn Ennym echey, son te eunyssagh.

4As cre’n-oyr? ta’n Chiarn er reih Jacob da hene: as Israel son e eiraght hene.

5Son ta fys aym dy vel y Chiarn mooar: as dy vel y Chiarn ainyn erskyn dy chooilley yee.

6Cre-erbee s’gooidsave lesh y Chiarn, shen ren eh ayns niau, as er y thalloo: ayns yn aarkey, as ayns ooilley ny diunidyn mooarey.

7T’eh cur magh ny bodjallyn veih ardjyn sodjey magh y theihll: as cur magh ny tendreilyn-taarnee lesh y fliaghey, tayrn ny geayghyn magh ass e hashtaghyn.

8Woaill eh yn chied er ny ruggey ayns cheer Egypt: chammah dy gheiney as maase.

9T’eh er hoilshaghey cowraghyn as yindyssyn ayns y vean ayd’s, O heer Egypt: er Pharaoh as ooilley e vooinjer.

10Woaill eh ymmodee ashoonyn: as stroie eh reeaghyn niartal;

11Sihon ree ny Amoriteyn, as Og ree Vasan: as ooilley reeriaghtyn Chanaan;

12As hug eh yn cheer oc dy ve son eiraght: dy jarroo son eiraght da Israel e phobble.

13Ta dt’Ennym, O Hiarn, farraghtyn son dy bragh: as dty imraa myrgeddin, O Hiarn, veih sheeloghe gys sheeloghe.

14Son gowee yn Chiarn cooilleeney son e phobble: as bee eh graysoil da e harvaantyn.

15Er son jallooyn ny ashoonyn, cha vel ad agh argid as airh: obbyr laueyn deiney;

16Ta beïll oc, as cha vel ad loayrt: ta sooillyn oc, agh cha vel ad fakin.

17Ta cleayshyn oc, agh cha vel ad clashtyn: chamoo ta veg yn ennal ayns nyn meeal.

18T’adsyn ta jannoo ad casley roo: as myr shen t’adsyn ooilley ta cur nyn dreishteil ayndoo.

19Moylley-jee yn Chiarn, shiuish hie Israel: moylley-jee yn Chiarn, shiuish hie Aaron.

20Moylley-jee yn Chiarn, shiuish hie Levi: shiuish ta goaill aggle roish y Chiarn, bannee-jee yn Chiarn.

21Bannit dy row yn Chiarn veih Sion: ta baghey ec Jerusalem.