Online Bible

Read the Bible

Version
Book
Chapter

Psalmyn 116

PSALM 116

1Ta mee feer wooiagh: dy vel y Chiarn er chlashtyn coraa my phadjer;

2Dy vel eh er chroymmey e chleaysh hym: shen-y-fa nee’m geamagh er choud as vee’m bio.

3Haink ribbaghyn y vaaish mygeayrt-y-moom: as ghow pianyn niurin greme orrym.

4Hooar mee seaghyn as trimshey, as ren mee geamagh er Ennym y Chiarn: O Hiarn, ta mee guee ort, livrey m’annym.

5Ta’n Chiarn graysoil as cairal: dy jarroo, ta’n Jee ainyn myghinagh.

6Ta’n Chiarn coadey adsyn ta gyn-loght: va mish ayns seaghyn, as chooin eh lhiam.

7Chyndaa reesht eisht gys dt’ea, O my annym: son ta’n Chiarn er dty chooilleeney.

8As cre’n-fa? t’ou er livrey m’annym veih baase: my hooillyn veih jeïr, as my chassyn veih tuittym.

9Neem’s gimmeeaght kiongoyrt rish y Chiarn: ayns cheer y sleih bio.

10Ren mee credjal, as shen-y-fa nee’m loayrt; agh va mee dy mooar seaghnit: dooyrt mee ayns my hiyr, Ta dy chooilley ghooinney mollit.

11Cre’n cooilleeney ver-ym da’n Chiarn: son ooilley ny bannaghtyn t’eh er hoilshaghey dou?

12Neem’s goaill cappan y taualtys: as nee’m geamagh er Ennym y Chiarn.

13Nee’m my vreearraghyn y eeck nish kionfenish ooilley e phobble: feer deyr ayns shilley’n Chiarn ta baase e nooghyn.

14Cur-my-ner, O Hiarn, kys dy vel mish dty harvaant: ta mish dty harvaant, as mac dt’inney-veyl; t’ou er vrishey my chianglaghyn veih-my-cheilley.

15Cheb-ym hood’s yn oural dy hoyrt-booise: as nee’m geamagh er Ennym y Chiarn.

16Eeck-ym my vreearraghyn gys y Chiarn, ayns fenish ooilley e phobble: ayns cooyrtyn thie yn Chiarn, dy jarroo, ayns y vean ayd’s, O Yerusalem. Moylley-jee yn Chiarn.