Online Bible

Read the Bible

Version
Book
Chapter

Psalmyn 108

PSALM 108

1O Yee, ta my chree aggindagh, ta my chree aggindagh: goym arrane, as ver-ym moylley lesh rere my phooar.

2Dooisht, uss lute as chlaasagh: dooisht-yms mee hene feer voghey.

3Ver-ym booise dhyt’s, O Hiarn, mastey’n pobble: goym arraneyn-moyllee hood’s mastey ny ashoonyn.

4Son ta dty vyghin ny syrjey na ny niaughyn: as ta dty ynrickys roshtyn gys ny bodjallyn.

5Soie oo hene seose, O Yee, erskyn ny niaughyn: as dty ghloyr erskyn ooilley yn seihll;

6Dy vod dty chloan reiht v’er nyn livrey: lhig da dty laue yesh ad y hauail, as clasht uss rhym’s.

7Ta Jee er loayrt ayns e chasherickys, Nee’m er-y-fa shen boggey ’ghoaill, as rheynn-ym Sichem: as towse-ym magh coan Succoth.

8Ta Gilead lhiam’s, as lhiam’s Manasses: ta Ephraim myrgeddin troshid my ching;

9Ta Judah m’er-reill ’sy leigh, Moab my haagh-nieeaghyn: shooill-ym harrish Edom; harrish Philistia yioym y varriaght.

10Quoi nee m’y leeideil gys yn ard-valley lajer: quoi ver lesh mee stiagh gys Edom?

11Nagh vel uss er hreigeil shin, O Yee: as nagh jean uss, O Yee, goll magh marish ny sheshaghtyn-caggee ain?

12O cooin lhien noi’n noid: son s’fardalagh ta cooney dooinney.

13Trooid Jee nee mayd obbraghyn mooarey: as eshyn eh ver fo-chosh nyn noidyn.