Isaiah 62
1Er graih Zion cha bee’m my host, as er graih Yerusalem cha goym fea, derrey hed yn ynrickys echey magh myr sollyssid, as yn saualtys echey goll-rish lamp ta lossey. 2As ver ny ashoonee my-ner dty ynrickys, as dy chooilley ree dty ghloyr: as bee oo cowrit liorish ennym noa, nee beeal y Chiarn genmys. 3Bee uss myrgeddin attey dy ghloyr ayns laue y Chiarn, as crown reeoil ayns laue dty Yee. 4Cha bee uss ny smoo enmyssit Yn unnane treigit: chamoo vees dty heer ny lurg shoh enmyssit Traartys: agh bee uss enmyssit Hephzibah, as dty heer Beulah: son ta’n Chiarn goaill taitnys aynyd, as bee dty heer poost rish. 5Son myr ta dooinney aeg poosey moidyn, myr shen nee yn Chiarn uss y phoosey: as myr ta’n dooinney-poosee goaill boggey harrish y ven-phoost, myr shen myrgeddin nee dty Yee goaill boggey harryd’s. 6Ta mee er hoiaghey arreyderyn er dty voallaghyn, O Yerusalem, nagh bee nyn dhost laa ny oie: shiuish ta enmyssit er y Chiarn, ny bee-jee nyn dhost; 7As ny cur-jee fea da, derrey ver eh shickyrys, as derrey nee eh jannoo Jerusalem ny voylley er y thalloo. 8Ta’n Chiarn er vreearrey liorish e laue yesh, as liorish niart e roih, Shickyr cha der-ym maghey shoh dty arroo dy ve beaghey da dty noidyn; chamoo nee yn chloan yoarree giu yn feeyn ayd’s t’ou er laboragh er y hon: 9Agh adsyn t’er haglym eh nee gee jeh, as bannaghey yn Chiarn; as adsyn t’er hymsagh eh cooidjagh nee giu jeh ayns cooyrtyn my chasherickys.
10Trooid lhieu, immee-jee trooid ny giattyn; kiartee-jee yn raad roish y pobble; tilg-jee seose, tilg-jee seose yn raad-mooar; chymsee-jee ersooyl ny claghyn: trog-jee seose mergey da’n pobble. 11Cur-my-ner, ta’n Chiarn er n’ockley magh gys ardjyn sodjey magh y theihll, Abbyr-jee rish inneen Zion, Cur-my-ner, ta dty haualtagh cheet; cur-my-ner, ta’n leagh echey mârish, as e obbyr kiongoyrt rish. 12As bee ad enmyssit Yn pobble casherick, Cloan chionnit y Chiarn: as bee uss enmyssit Ennoil, Yn ard-valley nagh vel treigit.