Read the Bible

¹Gwaeddwch yn uchel i Dduw,

holl bobl y byd!

²Canwch gân i ddweud mor wych ydy e,

a’i foli’n hyfryd.

³Dwedwch wrth Dduw,

“Mae dy weithredoedd di mor syfrdanol!

Am dy fod ti mor rymus mae dy elynion yn crynu o dy flaen.

⁴Mae’r byd i gyd yn dy addoli,

ac yn canu mawl i ti!

Maen nhw’n dy foli di ar gân!”

⁵Dewch i weld beth wnaeth Duw.

Mae’r hyn wna ar ran pobl yn syfrdanol.

⁶Trodd y môr yn dir sych,

a dyma nhw’n cerdded drwy’r afon!

Gadewch i ni ddathlu’r peth!

⁷Mae e’n dal i deyrnasu yn ei nerth,

ac mae’n cadw ei lygaid ar y cenhedloedd;

felly peidiwch gwrthryfela a chodi yn ei erbyn.

⁸O bobloedd, bendithiwch ein Duw ni;

gadewch i ni glywed pobl yn ei foli!

⁹Fe sy’n ein cadw ni’n fyw;

dydy e ddim wedi gadael i’n traed lithro.

¹⁰Ti wedi’n profi ni, O Dduw,

a’n puro ni fel arian mewn ffwrnais.

¹¹Ti wedi’n dal ni mewn rhwyd,

a gwneud i ni ddioddef baich trwm.

¹²Ti wedi gadael i bobl farchogaeth droson ni.

Dŷn ni wedi bod drwy ddŵr a thân,

ond ti wedi dod â ni drwy’r cwbl i brofi digonedd.

¹³Dw i’n dod i dy deml ag offrymau llosg

ac yn cadw fy addewidion,

¹⁴drwy wneud popeth wnes i addo

pan oeddwn i mewn trafferthion.

¹⁵Dw i’n dod ag anifeiliaid wedi’u pesgi yn offrymau llosg –

arogl hyrddod yn cael eu llosgi,

teirw a geifr yn cael eu haberthu.

¹⁶Dewch i wrando, chi sy’n addoli Duw,

i mi ddweud wrthoch chi beth wnaeth e i mi.

¹⁷Dyma fi’n gweiddi’n uchel arno am help

– roeddwn i’n barod i’w foli.

¹⁸Petawn i’n euog o feddwl yn ddrwg amdano,

fyddai’r ARGLWYDD ddim wedi gwrando arna i.

¹⁹Ond dyma Duw yn clywed,

a gwrando ar fy ngweddi.

²⁰Mae Duw yn haeddu ei foli!

Wnaeth e ddim diystyru fy ngweddi,

na bod yn anffyddlon i mi.