Read the Bible

¹Dewch, angylion, Cyhoeddwch!

Cyhoeddwch mor wych ac mor gryf ydy’r ARGLWYDD!

²Cyhoeddwch mor wych ydy ei enw da!

Plygwch i addoli’r ARGLWYDD

sydd mor hardd yn ei gysegr.

³Mae llais yr ARGLWYDD i’w glywed uwchben y dŵr –

sŵn y Duw gwych yn taranu.

Mae’r ARGLWYDD yn taranu uwchben y dyfroedd mawr.

⁴Mae llais yr ARGLWYDD yn rymus.

Mae llais yr ARGLWYDD yn urddasol.

⁵Mae llais yr ARGLWYDD yn dryllio’r cedrwydd;

mae e’n dryllio coed cedrwydd Libanus.

⁶Mae’n gwneud i Libanus brancio fel llo;

a Sirion fel ych gwyllt ifanc.

⁷Mae llais yr ARGLWYDD fel mellt yn fflachio.

⁸Mae llais yr ARGLWYDD yn ysgwyd yr anialwch;

mae’r ARGLWYDD yn ysgwyd anialwch Cadesh.

⁹Mae llais yr ARGLWYDD yn plygu’r coed mawr,

ac yn tynnu’r dail oddi ar y fforestydd.

Ac yn ei deml mae pawb yn gweiddi, “Rwyt ti’n wych!”

¹⁰Mae’r ARGLWYDD ar ei orsedd uwchben y llifogydd.

Mae’r ARGLWYDD yn Frenin ar ei orsedd am byth.

¹¹Mae’r ARGLWYDD yn gwneud ei bobl yn gryf.

Mae’r ARGLWYDD yn rhoi heddwch i’w bobl.