Yr unig Dduw go iawn

¹Nid ni, O ARGLWYDD, nid ni –

ti sy'n haeddu'r anrhydedd i gyd,

am ddangos y fath gariad a ffyddlondeb.

²Pam ddylai pobl y cenhedloedd ddweud,

“Ble mae eu Duw nhw nawr?”

³Y gwir ydy fod Duw yn y nefoedd,

ac yn gwneud beth bynnag mae e eisiau!

⁴Dydy eu heilunod nhw'n ddim ond arian ac aur

wedi'u siapio gan ddwylo dynol.

⁵Mae ganddyn nhw gegau, ond allan nhw ddim siarad;

llygaid, ond allan nhw ddim gweld;

⁶clustiau, ond allan nhw ddim clywed;

trwynau, ond allan nhw ddim arogli;

⁷dwylo, ond allan nhw ddim teimlo;

traed, ond allan nhw ddim cerdded;

a dydy eu gyddfau ddim yn gallu gwneud sŵn!

⁸Mae'r bobl sy'n eu gwneud nhw,

a'r bobl sydd yn eu haddoli nhw,

yn troi'n debyg iddyn nhw!

⁹Israel, cred di yn yr ARGLWYDD!

Fe sy'n dy helpu di ac yn dy amddiffyn di.

¹⁰Chi offeiriaid, credwch yn yr ARGLWYDD!

Fe sy'n eich helpu ac yn eich amddiffyn chi.

¹¹Chi sy'n addoli'r ARGLWYDD, credwch yn yr ARGLWYDD!

Fe sy'n eich helpu chi ac yn eich amddiffyn chi.

¹²Mae'r ARGLWYDD yn cofio amdanon ni,

a bydd yn ein bendithio ni –

bydd yn bendithio pobl Israel;

bydd yn bendithio teulu Aaron;

¹³bydd yn bendithio'r rhai sy'n addoli'r ARGLWYDD,

yn ifanc ac yn hen.

¹⁴Boed i'r ARGLWYDD roi plant i chi;

ie, i chi a'ch plant hefyd!

¹⁵Boed i'r ARGLWYDD, wnaeth greu'r nefoedd a'r ddaear,

eich bendithio chi!

¹⁶Yr ARGLWYDD sydd biau'r nefoedd,

ond mae wedi rhoi'r ddaear yng ngofal y ddynoliaeth.

¹⁷Dydy'r meirw ddim yn gallu moli'r ARGLWYDD,

maen nhw wedi mynd i dawelwch y bedd.

¹⁸Ond dŷn ni'n mynd i foli'r ARGLWYDD

o hyn allan, ac am byth!

Haleliwia!