Read the Bible

¹Fy mab, os byddi di’n derbyn beth dw i’n ddweud,

ac yn trysori’r hyn dw i’n ei orchymyn;

²os gwnei di wrando’n astud ar ddoethineb,

a cheisio deall yn iawn;

³os byddi di’n gofyn am gyngor doeth,

ac yn awyddus i ddeall yn iawn;

⁴os byddi’n ceisio doethineb fel arian

ac yn chwilio amdani fel am drysor wedi’i guddio,

⁵yna byddi di’n deall sut i barchu’r ARGLWYDD

a byddi’n dod i wybod am Dduw.

⁶Achos yr ARGLWYDD sy’n rhoi doethineb;

beth mae e’n ddweud sy’n rhoi gwybodaeth a deall.

⁷Mae’n rhoi llwyddiant i’r un sy’n gwneud beth sy’n iawn –

ac mae fel tarian i amddiffyn y sawl sy’n byw yn onest.

⁸Mae’n gwneud yn siŵr fod cyfiawnder yn llwyddo,

ac mae’n gwarchod y rhai sy’n ffyddlon iddo.

⁹Byddi’n deall beth sy’n iawn, yn gytbwys, ac yn deg

– ie, popeth sy’n dda.

¹⁰Pan fydd doethineb yn rheoli dy ffordd o feddwl

a gwybod beth sydd orau yn dy gofleidio di,

¹¹bydd y ffordd wnei di ei dilyn yn saff,

a bydd deall yn dy warchod.

¹²Bydd yn dy gadw di rhag dilyn y drwg,

a rhag y bobl hynny sy’n twyllo o hyd –

¹³y rhai sydd wedi troi cefn ar ffyrdd gonest

i ddilyn llwybrau tywyll.

¹⁴Maen nhw wrth eu boddau’n gwneud drwg

ac yn mwynhau twyllo –

¹⁵pobl anonest ydyn nhw,

ac maen nhw’n dilyn ffyrdd troellog.

¹⁶Bydd yn dy achub di rhag y wraig anfoesol,

yr un lac ei moesau sy’n fflyrtian drwy’r adeg,

¹⁷yr un sydd wedi gadael ei gŵr,

a diystyru’r addewidion wnaeth hi o flaen Duw.

¹⁸Mae ei thŷ hi yn llwybr llithrig i farwolaeth;

mae ei dilyn hi yn arwain i fyd y meirw.

¹⁹Does neb sy’n mynd ati hi’n gallu troi yn ôl,

a chael eu hunain ar lwybr bywyd unwaith eto.

²⁰Dilyn di ffordd y rhai sy’n byw yn dda,

cadw at lwybrau’r rhai sy’n gwneud beth sy’n iawn.

²¹Y rhai sy’n gwneud beth sy’n iawn fydd yn byw yn y tir,

y rhai sy’n byw’n onest fydd yn cael aros yno.

²²Bydd pobl ddrwg yn cael eu gyrru i ffwrdd,

a’r rhai sy’n twyllo yn cael eu rhwygo o’r tir.