Read the Bible

¹Mae Bel ar ei liniau,

a Nabw yn gorwedd ar ei wyneb.

Baich ar gefn anifeiliaid ydy eu delwau nhw,

pethau mae’n rhaid eu cario – llwyth trwm

ar gefn anifeiliaid blinedig!

²Maen nhw hefyd wedi syrthio a phlygu gyda’i gilydd;

doedd dim modd arbed y llwyth,

ac maen nhw ar eu ffordd i’r gaethglud.

³“Gwrandwch arna i, bobl Jacob,

a phawb sydd ar ôl o bobl Israel.

Fi wnaeth eich cario chi pan oeddech chi yn y groth,

a dw i wedi’ch cynnal chi ers i chi gael eich geni.

⁴A bydd pethau yr un fath pan fyddwch chi’n hen;

bydda i’n dal i’ch cario chi pan fydd eich gwallt wedi troi’n wyn!

Fi wnaeth chi, a fi sy’n eich cario chi –

fi sy’n gwneud y cario, a fi sy’n achub.

⁵Pwy sy’n cymharu hefo fi?

Oes rhywun tebyg i mi?

Dwedwch i bwy dw i’n debyg?

Oes rhywun sydd yr un fath â mi?

⁶Mae rhai pobl yn gwagio’r aur o’u pwrs

ac yn pwyso’u harian mewn clorian,

yna’n talu gweithiwr metel i wneud duw iddyn nhw,

ac wedyn yn ei addoli a syrthio ar eu hwynebau o’i flaen!

⁷Mae’n rhaid iddyn nhw ei gario ar eu hysgwyddau,

ac wedyn maen nhw’n ei osod ar ei draed,

a dydy e ddim yn gallu symud!

Os ydy rhywun yn galw arno, dydy e ddim yn ateb;

a dydy e ddim yn gallu achub neb o’i drafferthion!

⁸Cofiwch chi hynny, a dal gafael yn y ffaith!

Meddyliwch am y peth, chi wrthryfelwyr!

⁹Cofiwch beth dw i wedi’i wneud yn y gorffennol.

Achos fi sydd Dduw, a does dim un arall yn bod.

Fi ydy Duw, a does neb tebyg i mi.

¹⁰Dw i’n dweud o’r dechrau beth fydd yn digwydd ar y diwedd,

ac yn dangos ymlaen llaw bethau sydd heb ddigwydd eto.

Dw i’n dweud: ‘Bydd fy nghynllun i yn digwydd;

dw i’n cyflawni popeth dw i’n ei fwriadu.’

¹¹Fi alwodd yr aderyn rheibus yna o’r dwyrain,

yr un ddaeth o bell i gyflawni fy mhwrpas i.

Pan dw i’n dweud rhywbeth, mae’n siŵr o ddigwydd;

fi sydd wedi’i gynllunio, a bydda i’n siŵr o’i wneud!

¹²Gwrandwch arna i, chi bobl benstiff,

sy’n cadw draw oddi wrth beth sy’n iawn:

¹³dw i ar fin gwneud pethau’n iawn;

dydy hyn ddim yn y dyfodol pell –

fydd achubiaeth ddim yn cael ei gohirio.

Dw i’n mynd i achub Seion!

A rhoi fy ysblander i Israel!”