Read the Bible

¹Dyma’r ARGLWYDD yn dweud wrtho i: ²“Ddyn, dw i eisiau i ti droi i wynebu mynyddoedd Israel, a proffwydo yn eu herbyn nhw.

³“Dywed, ‘Fynyddoedd Israel, gwrandwch ar neges y Meistr, yr ARGLWYDD! Dyma mae e’n ddweud wrth y mynyddoedd a’r bryniau, y ceunentydd a’r dyffrynnoedd: Dw i’n anfon byddin i ymosod arnoch chi, a dinistrio’ch allorau paganaidd lleol chi. ⁴Fydd yr allorau’n ddim byd ond rwbel, a’r llestri i losgi arogldarth wedi’u malu’n ddarnau. Bydd pobl yn syrthio’n farw o flaen eich eilunod da i ddim. ⁵Bydd cyrff meirw yn gorwedd o’u blaen, ac esgyrn pobl ym mhobman o gwmpas yr allorau. ⁶Fydd dim dianc! Bydd eich trefi’n cael eu dinistrio’n llwyr, a’r allorau paganaidd yn ddim byd ond rwbel. Bydd yr eilunod wedi’u malu a’u bwrw i lawr, a’r llestri arogldarth yn ddarnau. Fydd dim byd o’ch gwaith llaw chi ar ôl! ⁷Bydd cyrff marw ym mhobman! Byddwch chi’n gwybod wedyn mai fi ydy’r ARGLWYDD.

⁸“‘Ond bydda i’n gadael i rai ohonoch chi ddianc. Bydd y rheiny’n ffoaduriaid wedi’u gyrru ar chwâl drwy’r gwledydd. ⁹A byddan nhw’n cofio amdana i yno! Byddan nhw’n sylweddoli sut roedden nhw’n torri fy nghalon i wrth fod mor anffyddlon a dilyn pa dduw bynnag oedd yn cymryd eu ffansi. Bydd ganddyn nhw gymaint o gywilydd am eu bod wedi cymryd rhan mewn defodau mor ffiaidd. ¹⁰Byddan nhw’n deall mai fi ydy’r ARGLWYDD, ac mai nid bygythiad gwag oedd y drychineb ddaeth arnyn nhw!’”

¹¹Dyma mae’r ARGLWYDD, y Meistr, yn ei ddweud:

“Dangos mor ddig wyt ti drwy ysgwyd dy ddwrn a stampio dy draed, a gweiddi, ‘Gwae!’ o achos yr holl bethau ffiaidd mae pobl Israel wedi’u gwneud. Byddan nhw’n cael eu lladd gan gleddyf y gelyn, newyn, neu haint.” ¹²Bydd pobl yn marw ym mhobman! Bydd y rhai sy’n bell i ffwrdd yn marw o afiechydon, y rhai sy’n agos yn cael eu lladd gan y gelyn, ac unrhyw un sydd ar ôl yn marw o newyn. Bydda i’n tywallt hynny o ddigofaint sydd gen i arnyn nhw! ¹³Bydd eu cyrff marw yn gorwedd ym mhobman, am eu bod nhw wedi bod yn llosgi arogldarth i’w heilunod. Bydd cyrff o gwmpas yr eilunod a’r allorau paganaidd, ar bob bryn uchel a mynydd, a dan pob coeden ddeiliog. Byddan nhw’n deall wedyn mai fi ydy’r ARGLWYDD! ¹⁴Dw i’n mynd i’w taro nhw’n galed. Fydd eu tir nhw yn ddim byd ond anialwch diffaith, yr holl ffordd o’r diffeithwch yn y de i Ribla yn y gogledd. Byddan nhw’n deall wedyn mai fi ydy’r ARGLWYDD!