Read the Bible

¹Yn ystod blwyddyn gyntaf teyrnasiad Belshasar, brenin Babilon, cafodd Daniel freuddwyd – gweledigaeth tra oedd yn cysgu yn ei wely. Ysgrifennodd grynodeb o’r freuddwyd. ²“Yn y weledigaeth ges i y noson honno roedd storm fawr ar y môr, a gwyntoedd yn chwythu o bob cyfeiriad. ³A dyma bedwar creadur mawr yn codi allan o’r môr, pob un ohonyn nhw’n wahanol i’w gilydd.

⁴“Roedd y cyntaf yn edrych fel llew, ond gydag adenydd fel eryr. Tra oeddwn i’n edrych, cafodd yr adenydd eu rhwygo oddi arno. Yna cafodd ei godi nes ei fod yn sefyll ar ei draed fel person dynol, a chafodd feddwl dynol.

⁵“Wedyn dyma fi’n gweld ail greadur – un gwahanol. Roedd hwn yn edrych fel arth. Roedd yn symud o ochr i ochr, ac roedd ganddo dair asen yn ei geg, rhwng ei ddannedd. A dyma lais yn dweud wrtho, ‘Dos! Ymosod, a llarpio llawer o bobl!’

⁶“Yna, wrth i mi edrych, dyma greadur arall yn dod i’r golwg. Roedd hwn yn edrych fel llewpard, ond roedd ganddo bedair o adenydd ar ei gefn, fel adenydd adar. Roedd gan y creadur yma bedwar pen, a chafodd awdurdod i lywodraethu.

⁷“Wedyn, yn y weledigaeth ges i y noson honno, dyma bedwerydd creadur yn dod i’r golwg. Roedd hwn yn un erchyll, dychrynllyd, ac yn ofnadwy o gryf. Roedd ganddo ddwy res o ddannedd haearn. Roedd yn llarpio a chnoi, a sathru beth bynnag oedd ar ôl dan draed. Roedd yn hollol wahanol i’r creaduriaid eraill, ac roedd ganddo ddeg corn.

⁸“Tra oeddwn i’n edrych ar y cyrn, dyma gorn arall – un bach – yn codi rhyngddyn nhw. Dyma dri o’r cyrn eraill yn cael eu gwthio o’u gwraidd i wneud lle i’r un bach. Roedd gan y corn yma lygaid tebyg i lygaid person dynol, a cheg oedd yn brolio pethau mawr.

¹¹“Rôn i’n dal i edrych wrth i’r corn bach ddal ati i frolio pethau mawr. Ac wrth i mi edrych dyma’r pedwerydd creadur yn cael ei ladd a’i daflu i’r tân. ¹²(Cafodd yr awdurdod i lywodraethu ei gymryd oddi ar y creaduriaid eraill, er eu bod wedi cael byw am gyfnod ar ôl hynny.)

¹⁵“Rôn i, Daniel, wedi cynhyrfu’r tu mewn. Roedd y gweledigaethau wedi fy nychryn i. ¹⁶Dyma fi’n mynd at un o’r rhai oedd yn sefyll yno, a gofyn beth oedd ystyr y cwbl. A dyma fe’n esbonio’r freuddwyd i mi.

¹⁷“‘Mae’r pedwar creadur mawr yn cynrychioli pedwar brenin daearol fydd yn teyrnasu. ¹⁸Ond yn y diwedd bydd pobl sanctaidd y Duw Goruchaf yn cael teyrnasu – byddan nhw’n teyrnasu am byth!’

¹⁹“Ond wedyn roeddwn i eisiau gwybod mwy am y pedwerydd creadur, yr un oedd yn hollol wahanol i’r lleill. Roedd hwnnw’n wirioneddol ddychrynllyd gyda’i ddannedd haearn a’i grafangau pres. Roedd yn llarpio a chnoi, a sathru dan draed bopeth oedd yn dal i sefyll. ²⁰Rôn i hefyd eisiau gwybod beth oedd y deg corn ar ei ben, a’r corn bach gododd wedyn a gwneud i dri o’r lleill syrthio. Dyma’r corn oedd gyda llygaid, a cheg oedd yn brolio pethau mawr. Roedd y corn yma’n edrych yn gryfach na’r lleill. ²¹Rôn i’n gweld y corn yma yn brwydro yn erbyn pobl sanctaidd Duw ac yn eu trechu nhw. ²²Dyna oedd yn digwydd hyd nes i’r Un Hynafol ddod a barnu o blaid pobl sanctaidd y Duw Goruchaf. A dyma nhw wedyn yn cael teyrnasu.

²³“Dyma ddwedodd wrtho i:

²⁸A dyna ddiwedd y weledigaeth. Roeddwn i, Daniel, wedi dychryn. Rôn i’n welw. Ond cedwais y cwbl i mi fy hun.”