Read the Bible

¹Oracl. Gair yr ARGLWYDD yn nhir Hadrach

ac yn Namascus, ei orffwysfa.

Yn wir, eiddo'r ARGLWYDD yw dinasoedd Aram,

fel holl lwythau Israel;

²hefyd Hamath, sy'n terfynu arni,

a Tyrus a Sidon, er eu bod yn ddoeth iawn.

³Cododd Tyrus dŵr iddi ei hun;

pentyrrodd arian fel llwch,

ac aur fel llaid heol.

⁴Ond wele, y mae'r ARGLWYDD yn cymryd ei heiddo

ac yn difetha ei grym ar y môr;

ac ysir hithau yn y tân.

⁵Bydd Ascalon yn gweld ac yn ofni,

Gasa hefyd, a bydd yn gwingo gan ofid,

ac Ecron, oherwydd drysir ei gobaith;

derfydd am frenin yn Gasa,

a bydd Ascalon heb drigolion;

⁶pobl gymysgryw fydd yn trigo yn Asdod,

a thorraf ymaith falchder y Philistiad.

⁷Tynnaf ymaith ei waed o'i enau,

a'i ffieidd-dra oddi rhwng ei ddannedd;

bydd yntau'n weddill i'n Duw ni,

ac fel tylwyth yn Jwda;

a bydd Ecron fel y Jebusiaid.

⁸Yna gwersyllaf i wylio fy nhŷ,

fel na chaiff neb fynd i mewn nac allan.

Ni ddaw gorthrymydd atynt mwyach,

oherwydd yr wyf yn gwylio'n awr â'm llygaid fy hun.

⁹“Llawenha'n fawr, ferch Seion;

bloeddia'n uchel, ferch Jerwsalem.

Wele dy frenin yn dod atat

â buddugoliaeth a gwaredigaeth,

yn ostyngedig ac yn marchogaeth ar asyn,

ar ebol, llwdn asen.

¹⁰Tyr ymaith y cerbyd o Effraim

a'r meirch o Jerwsalem;

a thorrir ymaith y bwa rhyfel.

Bydd yn siarad heddwch â'r cenhedloedd;

bydd ei lywodraeth o fôr i fôr,

o'r Ewffrates hyd derfynau'r ddaear.

¹¹“Amdanat ti, oherwydd gwaed y cyfamod rhyngom,

gollyngaf dy garcharorion yn rhydd o'r pydew di-ddŵr.

¹²Dychwelwch i'ch amddiffynfa, chwi garcharorion hyderus;

heddiw yr wyf yn cyhoeddi i chwi adferiad dauddyblyg.

¹³Yr wyf wedi plygu fy mwa, Jwda,

ac wedi gosod fy saeth ynddo, Effraim;

codaf dy feibion, Seion,

yn erbyn meibion Groeg,

a gwnaf di yn gleddyf rhyfelwr.”

¹⁴Bydd yr ARGLWYDD yn ymddangos uwch eu pennau,

a'i saeth yn fflachio fel mellten;

Bydd yr Arglwydd DDUW yn rhoi bloedd â'r utgorn

ac yn mynd allan yng nghorwyntoedd y de.

¹⁵Bydd ARGLWYDD y Lluoedd yn amddiffyn iddynt;

llwyddant, sathrant y cerrig tafl,

byddant yn derfysglyd feddw fel gan win,

wedi eu trochi fel cyrn allor.

¹⁶Y dydd hwnnw bydd yr ARGLWYDD eu Duw yn eu gwaredu;

bydd ei bobl fel praidd,

fel gemau coron yn disgleirio dros ei dir.

¹⁷Mor dda ac mor brydferth fydd!

Bydd ŷd yn nerth i'r llanciau,

a gwin i'r morynion.