Read the Bible

¹Mor brydferth yw dy breswylfod,

O ARGLWYDD y Lluoedd.

²Yr wyf yn hiraethu, yn dyheu hyd at lewyg

am gynteddau'r ARGLWYDD;

y mae'r cyfan ohonof yn gweiddi'n llawen

ar y Duw byw.

³Cafodd hyd yn oed aderyn y to gartref,

a'r wennol nyth iddi ei hun,

lle mae'n magu ei chywion, wrth dy allorau di,

O ARGLWYDD y Lluoedd, fy Mrenin a'm Duw.

⁴Gwyn eu byd y rhai sy'n trigo yn dy dŷ,

yn canu mawl i ti'n wastadol.

⁵Gwyn eu byd y rhai yr wyt ti'n noddfa iddynt,

a ffordd y pererinion yn eu calon.

⁶Wrth iddynt fynd trwy ddyffryn Baca

fe'i cânt yn ffynnon;

bydd y glaw cynnar yn ei orchuddio â bendith.

⁷Ânt o nerth i nerth,

a bydd Duw y duwiau yn ymddangos yn Seion.

⁸O ARGLWYDD Dduw'r Lluoedd, clyw fy ngweddi;

gwrando arnaf, O Dduw Jacob.

⁹Edrych ar ein tarian, O Dduw;

rho ffafr i'th eneiniog.

¹⁰Gwell yw diwrnod yn dy gynteddau di

na mil gartref;

gwell sefyll wrth y drws yn nhŷ fy Nuw

na thrigo ym mhebyll drygioni.

¹¹Oherwydd haul a tharian yw'r ARGLWYDD Dduw;

rhydd ras ac anrhydedd.

Nid atal yr ARGLWYDD unrhyw ddaioni

oddi wrth y rhai sy'n rhodio'n gywir.

¹²O ARGLWYDD y Lluoedd,

gwyn ei fyd y sawl sy'n ymddiried ynot.