Read the Bible

¹Gwrando, O fugail Israel,

sy'n arwain Joseff fel diadell.

²Ti sydd wedi dy orseddu ar y cerwbiaid,

disgleiria i Effraim, Benjamin a Manasse.

Gwna i'th nerth gyffroi,

a thyrd i'n gwaredu.

³Adfer ni, O Dduw;

bydded llewyrch dy wyneb arnom, a gwareder ni.

⁴O ARGLWYDD Dduw y Lluoedd,

am ba hyd y byddi'n ddig wrth weddïau dy bobl?

⁵Yr wyt wedi eu bwydo â bara dagrau,

a'u diodi â mesur llawn o ddagrau.

⁶Gwnaethost ni'n ddirmyg i'n cymdogion,

ac y mae ein gelynion yn ein gwawdio.

⁷O Dduw'r Lluoedd, adfer ni;

bydded llewyrch dy wyneb arnom, a gwareder ni.

⁸Daethost â gwinwydden o'r Aifft;

gyrraist allan genhedloedd er mwyn ei phlannu;

⁹cliriaist y tir iddi;

magodd hithau wreiddiau a llenwi'r tir.

¹⁰Yr oedd ei chysgod yn gorchuddio'r mynyddoedd,

a'i changau fel y cedrwydd cryfion;

¹¹estynnodd ei brigau at y môr,

a'i blagur at yr afon.

¹²Pam felly y bylchaist ei chloddiau,

fel bod y rhai sy'n mynd heibio yn tynnu ei ffrwyth?

¹³Y mae baedd y goedwig yn ei thyrchu,

ac anifeiliaid gwyllt yn ei phori.

¹⁴O Dduw'r Lluoedd, tro eto,

edrych i lawr o'r nefoedd a gwêl,

gofala am y winwydden hon,

¹⁵y planhigyn a blennaist â'th ddeheulaw,

y gainc yr wyt yn ei chyfnerthu.

¹⁶Bydded i'r rhai sy'n ei llosgi â thân ac yn ei thorri i lawr

gael eu difetha gan gerydd dy wynepryd.

¹⁷Ond bydded dy law ar y sawl sydd ar dy ddeheulaw,

ar yr un yr wyt ti'n ei gyfnerthu.

¹⁸Ni thrown oddi wrthyt mwyach;

adfywia ni, ac fe alwn ar dy enw.

¹⁹ARGLWYDD Dduw y Lluoedd, adfer ni;

bydded llewyrch dy wyneb arnom, a gwareder ni.