Read the Bible

¹O ARGLWYDD, ein Iôr, mor ardderchog yw dy enw ar yr holl ddaear!

Gosodaist dy ogoniant uwch y nefoedd,

²codaist amddiffyn rhag dy elynion

o enau babanod a phlant sugno,

a thawelu'r gelyn a'r dialydd.

³Pan edrychaf ar y nefoedd, gwaith dy fysedd,

y lloer a'r sêr, a roddaist yn eu lle,

⁴beth yw meidrolyn, iti ei gofio,

a'r teulu dynol, iti ofalu amdano?

⁵Eto gwnaethost ef ychydig islaw duw

a'i goroni â gogoniant ac anrhydedd.

⁶Rhoist iddo awdurdod ar waith dy ddwylo,

a gosod popeth dan ei draed:

⁷defaid ac ychen i gyd,

yr anifeiliaid gwylltion hefyd,

⁸adar y nefoedd, a physgod y môr,

a phopeth sy'n tramwyo llwybrau'r dyfroedd.

⁹O ARGLWYDD, ein Iôr, mor ardderchog yw dy enw ar yr holl ddaear!