Read the Bible

¹Clywch hyn, yr holl bobloedd,

gwrandewch, holl drigolion byd,

²yn wreng a bonedd,

yn gyfoethog a thlawd.

³Llefara fy ngenau ddoethineb,

a bydd myfyrdod fy nghalon yn ddeallus.

⁴Gogwyddaf fy nghlust at ddihareb,

a datgelaf fy nychymyg â'r delyn.

⁵Pam yr ofnaf yn nyddiau adfyd,

pan yw drygioni fy nisodlwyr o'm cwmpas,

⁶rhai sy'n ymddiried yn eu golud

ac yn ymffrostio yn nigonedd eu cyfoeth?

⁷Yn wir, ni all neb ei waredu ei hun

na thalu iawn i Dduw—

⁸oherwydd rhy uchel yw pris ei fywyd,

ac ni all byth ei gyrraedd—

⁹iddo gael byw am byth

a pheidio â gweld Pwll Distryw.

¹⁰Ond gwêl fod y doethion yn marw,

fod yr ynfyd a'r dwl yn trengi,

ac yn gadael eu cyfoeth i eraill.

¹¹Eu bedd yw eu cartref bythol,

eu trigfan dros y cenedlaethau,

er iddynt gael tiroedd i'w henwau.

¹²Ni all neb aros mewn rhwysg;

y mae fel yr anifeiliaid sy'n darfod.

¹³Dyma yw tynged yr ynfyd,

a diwedd y rhai sy'n cymeradwyo eu geiriau.

¹⁴Fel defaid y tynghedir hwy i Sheol;

angau fydd yn eu bugeilio;

disgynnant yn syth i'r bedd,

a bydd eu ffurf yn darfod;

Sheol fydd eu cartref.

¹⁵Ond bydd Duw'n gwaredu fy mywyd

ac yn fy nghymryd o afael Sheol.

¹⁶Paid ag ofni pan ddaw rhywun yn gyfoethog

a phan gynydda golud ei dŷ,

¹⁷oherwydd ni chymer ddim pan fo'n marw,

ac nid â ei gyfoeth i lawr i'w ganlyn.

¹⁸Er iddo yn ei fywyd ei ystyried ei hun yn ddedwydd,

a bod pobl yn ei ganmol am iddo wneud yn dda,

¹⁹fe â at genhedlaeth ei hynafiaid,

ac ni wêl oleuni byth mwy.

²⁰Ni all neb aros mewn rhwysg;

y mae fel yr anifeiliaid sy'n darfod.