Read the Bible

¹Symbylwyd fy nghalon gan neges dda;

adroddaf fy nghân am y brenin;

y mae fy nhafod fel pin ysgrifennydd buan.

²Yr wyt yn decach na phawb;

tywalltwyd gras ar dy wefusau

am i Dduw dy fendithio am byth.

³Gwisg dy gleddyf ar dy glun, O ryfelwr;

â mawredd a gogoniant addurna dy forddwyd.

⁴Marchoga o blaid gwirionedd, ac o achos cyfiawnder,

a bydded i'th ddeheulaw ddysgu iti bethau ofnadwy.

⁵Y mae dy saethau'n llym yng nghalon gelynion y brenin;

syrth pobloedd odanat.

⁶Y mae dy orsedd fel gorsedd Duw, yn dragwyddol,

a'th deyrnwialen yn wialen cyfiawnder.

⁷Ceraist gyfiawnder a chasáu drygioni;

am hynny bu i Dduw, dy Dduw di, dy eneinio

ag olew llawenydd uwchlaw dy gyfoedion.

⁸Y mae dy ddillad i gyd yn fyrr, aloes a chasia,

ac offerynnau llinynnol o balasau ifori yn dy ddifyrru.

⁹Y mae tywysogesau ymhlith merched dy lys;

saif y frenhines ar dy ddeheulaw, mewn aur Offir.

¹⁰Gwrando di, ferch, rho sylw a gogwydda dy glust:

anghofia dy bobl dy hun a thŷ dy dad;

¹¹yna bydd y brenin yn chwenychu dy brydferthwch,

oherwydd ef yw dy arglwydd.

¹²Ymostwng iddo ag anrhegion, O ferch Tyrus,

a bydd cyfoethogion y bobl yn ceisio dy ffafr.

¹³Cwbl ogoneddus yw merch y brenin,

cwrel wedi ei osod mewn aur sydd ar ei gwisg,

¹⁴ac mewn brodwaith yr arweinir hi at y brenin;

Ar ei hôl daw ei chyfeillesau, y morynion;

¹⁵dônt atat yn llawen a hapus,

dônt i mewn i balas y brenin.

¹⁶Yn lle dy dadau daw dy feibion,

a gwnei hwy'n dywysogion dros yr holl ddaear.

¹⁷Mynegaf dy glod dros y cenedlaethau,

nes bod pobl yn dy ganmol hyd byth.