Read the Bible

¹Bûm yn disgwyl a disgwyl wrth yr ARGLWYDD,

ac yna plygodd ataf a gwrando fy nghri.

²Cododd fi i fyny o'r pwll lleidiog,

allan o'r mwd a'r baw;

gosododd fy nhraed ar graig,

a gwneud fy nghamau'n ddiogel.

³Rhoddodd yn fy ngenau gân newydd,

cân o foliant i'n Duw;

bydd llawer, pan welant hyn, yn ofni

ac yn ymddiried yn yr ARGLWYDD.

⁴Gwyn ei fyd y sawl

sy'n rhoi ei ymddiriedaeth yn yr ARGLWYDD,

ac nad yw'n troi at y beilchion,

nac at y rhai sy'n dilyn twyll.

⁵Mor niferus, O ARGLWYDD, fy Nuw,

yw'r rhyfeddodau a wnaethost,

a'th fwriadau ar ein cyfer;

nid oes tebyg i ti!

Dymunwn eu cyhoeddi a'u hadrodd,

ond maent yn rhy niferus i'w rhifo.

⁶Nid wyt yn dymuno aberth ac offrwm—

rhoddaist imi glustiau agored—

ac nid wyt yn gofyn poethoffrwm ac aberth dros bechod.

⁷Felly dywedais, “Dyma fi'n dod;

y mae wedi ei ysgrifennu mewn rhol llyfr amdanaf

⁸fy mod yn hoffi gwneud ewyllys fy Nuw,

a bod dy gyfraith yn fy nghalon.”

⁹Bûm yn cyhoeddi cyfiawnder yn y gynulleidfa fawr;

nid wyf wedi atal fy ngwefusau,

fel y gwyddost, O ARGLWYDD.

¹⁰Ni chuddiais dy gyfiawnder yn fy nghalon,

ond dywedais am dy gadernid a'th waredigaeth;

ni chelais dy gariad a'th wirionedd

rhag y gynulleidfa fawr.

¹¹Paid tithau, ARGLWYDD, ag atal

dy dosturi oddi wrthyf;

bydded dy gariad a'th wirionedd

yn fy nghadw bob amser.

¹²Oherwydd y mae drygau dirifedi

wedi cau amdanaf;

y mae fy nghamweddau wedi fy nal

fel na allaf weld;

y maent yn fwy niferus na gwallt fy mhen,

ac y mae fy nghalon yn suddo.

¹³Bydd fodlon i'm gwaredu, ARGLWYDD;

O ARGLWYDD, brysia i'm cynorthwyo.

¹⁴Doed cywilydd, a gwaradwydd hefyd,

ar y rhai sy'n ceisio difa fy mywyd;

bydded i'r rhai sy'n cael pleser o wneud drwg imi

gael eu troi yn eu holau mewn dryswch.

¹⁵Bydded i'r rhai sy'n gweiddi, “Aha! Aha!” arnaf

gael eu syfrdanu gan eu gwaradwydd.

¹⁶Ond bydded i bawb sy'n dy geisio di

lawenhau a gorfoleddu ynot;

bydded i'r rhai sy'n caru dy iachawdwriaeth

ddweud yn wastad, “Mawr yw'r ARGLWYDD.”

¹⁷Un tlawd ac anghenus wyf fi,

ond y mae'r Arglwydd yn meddwl amdanaf.

Ti yw fy nghymorth a'm gwaredydd;

fy Nuw, paid ag oedi!