Read the Bible

¹Pam y mae'r cenhedloedd yn terfysgu

a'r bobloedd yn cynllwyn yn ofer?

²Y mae brenhinoedd y ddaear yn barod,

a'r llywodraethwyr yn ymgynghori â'i gilydd

yn erbyn yr ARGLWYDD a'i eneiniog:

³“Gadewch inni ddryllio eu rhwymau,

a thaflu ymaith eu rheffynnau.”

⁴Fe chwardd yr un sy'n eistedd yn y nefoedd;

y mae'r Arglwydd yn eu gwatwar.

⁵Yna fe lefara wrthynt yn ei lid

a'u dychryn yn ei ddicter:

⁶“Yr wyf fi wedi gosod fy mrenin

ar Seion, fy mynydd sanctaidd.”

⁷Adroddaf am ddatganiad yr ARGLWYDD.

Dywedodd wrthyf, “Fy mab wyt ti,

myfi a'th genhedlodd di heddiw;

⁸gofyn, a rhoddaf iti'r cenhedloedd yn etifeddiaeth,

ac eithafoedd daear yn eiddo iti;

⁹fe'u drylli â gwialen haearn

a'u malurio fel llestr pridd.”

¹⁰Yn awr, frenhinoedd, byddwch ddoeth;

farnwyr y ddaear, cymerwch gyngor;

¹¹gwasanaethwch yr ARGLWYDD mewn ofn,

mewn cryndod cusanwch ei draed,

¹²rhag iddo ffromi ac i chwi gael eich difetha;

oherwydd fe gyneua ei lid mewn dim.

Gwyn eu byd y rhai sy'n llochesu ynddo.