Read the Bible

¹O ARGLWYDD, gwared fi rhag pobl ddrygionus;

cadw fi rhag rhai sy'n gorthrymu,

²rhai sy'n cynllunio drygioni yn eu calon,

a phob amser yn codi cythrwfl.

³Y mae eu tafod yn finiog fel sarff,

ac y mae gwenwyn gwiber dan eu gwefusau.

⁴O ARGLWYDD, arbed fi rhag dwylo'r drygionus;

cadw fi rhag rhai sy'n gorthrymu,

rhai sy'n cynllunio i faglu fy nhraed.

⁵Bu rhai trahaus yn cuddio magl i mi,

a rhai dinistriol yn taenu rhwyd,

ac yn gosod maglau ar ymyl y ffordd.

⁶Dywedais wrth yr ARGLWYDD, “Fy Nuw wyt ti”;

gwrando, O ARGLWYDD, ar lef fy ngweddi.

⁷O ARGLWYDD Dduw, fy iachawdwriaeth gadarn,

cuddiaist fy mhen yn nydd brwydr.

⁸O ARGLWYDD, paid â rhoi eu dymuniad i'r drygionus,

paid â llwyddo eu bwriad.

⁹Y mae rhai o'm hamgylch yn codi eu pen,

ond bydded i ddrygioni eu gwefusau eu llethu.

¹⁰Bydded i farwor tanllyd syrthio arnynt;

bwrier hwy i ffosydd dyfnion heb allu codi.

¹¹Na fydded lle i'r enllibus yn y wlad;

bydded i ddrygioni ymlid y gorthrymwr yn ddiarbed.

¹²Gwn y gwna'r ARGLWYDD gyfiawnder â'r truan,

ac y rhydd farn i'r anghenus.

¹³Yn sicr bydd y cyfiawn yn clodfori dy enw;

bydd yr uniawn yn byw yn dy bresenoldeb.