Read the Bible

¹Arbed, O ARGLWYDD; oherwydd nid oes un teyrngar ar ôl,

a darfu am y ffyddloniaid o blith pobl.

²Y mae pob un yn dweud celwydd wrth ei gymydog,

y maent yn gwenieithio wrth siarad â'i gilydd.

³Bydded i'r ARGLWYDD dorri ymaith bob gwefus wenieithus

a'r tafod sy'n siarad yn ymffrostgar,

⁴y rhai sy'n dweud, “Yn ein tafod y mae ein nerth;

y mae ein gwefusau o'n tu; pwy sy'n feistr arnom?”

⁵“Oherwydd anrhaith yr anghenus a chri'r tlawd,

codaf yn awr,” meddai'r ARGLWYDD,

“rhoddaf iddo'r diogelwch yr hiraetha amdano.”

⁶Y mae geiriau'r ARGLWYDD yn eiriau pur:

arian wedi ei goethi mewn ffwrnais,

aur wedi ei buro seithwaith.

⁷Tithau, ARGLWYDD, cadw ni,

gwared ni am byth oddi wrth y genhedlaeth hon,

⁸am fod y drygionus yn prowla ar bob llaw,

a llygredd yn uchaf ymysg pobl.