Read the Bible

¹Diolchwch i'r ARGLWYDD. Galwch ar ei enw,

gwnewch yn hysbys ei weithredoedd ymysg y bobloedd.

²Canwch iddo, moliannwch ef,

dywedwch am ei holl ryfeddodau.

³Gorfoleddwch yn ei enw sanctaidd;

llawenhaed calon y rhai sy'n ceisio'r ARGLWYDD.

⁴Ceisiwch yr ARGLWYDD a'i nerth,

ceisiwch ei wyneb bob amser.

⁵Cofiwch y rhyfeddodau a wnaeth,

ei wyrthiau a'r barnedigaethau a gyhoeddodd,

⁶chwi ddisgynyddion Abraham, ei was,

disgynyddion Jacob, ei etholedig.

⁷Ef yw'r ARGLWYDD ein Duw,

ac y mae ei farnedigaethau dros yr holl ddaear.

⁸Y mae'n cofio ei gyfamod dros byth,

gair ei orchymyn hyd fil o genedlaethau,

⁹sef y cyfamod a wnaeth ag Abraham,

a'i lw i Isaac—

¹⁰yr hyn a osododd yn ddeddf i Jacob,

ac yn gyfamod tragwyddol i Israel,

¹¹a dweud, “I chwi y rhoddaf wlad Canaan

yn gyfran eich etifeddiaeth.”

¹²Pan oeddent yn fychan o rif,

yn ychydig, ac yn grwydriaid yn y wlad,

¹³yn crwydro o genedl i genedl,

ac o un deyrnas at bobl eraill,

¹⁴ni adawodd i neb eu darostwng,

ond ceryddodd frenhinoedd o'u hachos,

¹⁵a dweud, “Peidiwch â chyffwrdd â'm heneiniog,

na gwneud niwed i'm proffwydi.”

¹⁶Pan alwodd am newyn dros y wlad,

a thorri ymaith eu cynhaliaeth o fara,

¹⁷yr oedd wedi anfon gŵr o'u blaenau,

Joseff, a werthwyd yn gaethwas.

¹⁸Doluriwyd ei draed yn y cyffion,

a rhoesant haearn am ei wddf,

¹⁹nes i'r hyn a ddywedodd ef ddod yn wir,

ac i air yr ARGLWYDD ei brofi'n gywir.

²⁰Anfonodd y brenin i'w ryddhau—

brenin y cenhedloedd yn ei wneud yn rhydd;

²¹gwnaeth ef yn feistr ar ei dŷ,

ac yn llywodraethwr ar ei holl eiddo,

²²i hyfforddi ei dywysogion yn ôl ei ddymuniad,

ac i ddysgu doethineb i'w henuriaid.

²³Yna daeth Israel hefyd i'r Aifft,

a Jacob i grwydro yn nhir Ham.

²⁴A gwnaeth yr Arglwydd ei bobl yn ffrwythlon iawn,

ac aethant yn gryfach na'u gelynion.

²⁵Trodd yntau eu calon i gasáu ei bobl,

ac i ymddwyn yn ddichellgar at ei weision.

²⁶Yna anfonodd ei was Moses,

ac Aaron, yr un yr oedd wedi ei ddewis,

²⁷a thrwy eu geiriau hwy gwnaeth arwyddion

a gwyrthiau yn nhir Ham.

²⁸Anfonodd dywyllwch, ac aeth yn dywyll,

eto yr oeddent yn gwrthryfela yn erbyn ei eiriau.

²⁹Trodd eu dyfroedd yn waed,

a lladdodd eu pysgod.

³⁰Llanwyd eu tir â llyffaint,

hyd yn oed ystafelloedd eu brenhinoedd.

³¹Pan lefarodd ef, daeth haid o bryfed

a llau trwy'r holl wlad.

³²Rhoes iddynt genllysg yn lle glaw,

a mellt yn fflachio trwy eu gwlad.

³³Trawodd y gwinwydd a'r ffigyswydd,

a malurio'r coed trwy'r wlad.

³⁴Pan lefarodd ef, daeth locustiaid

a lindys heb rifedi,

³⁵nes iddynt fwyta'r holl laswellt trwy'r wlad,

a difa holl gynnyrch y ddaear.

³⁶A thrawodd bob cyntafanedig yn y wlad,

blaenffrwyth eu holl nerth.

³⁷Yna dygodd hwy allan gydag arian ac aur,

ac nid oedd un yn baglu ymysg y llwythau.

³⁸Llawenhaodd yr Eifftiaid pan aethant allan,

oherwydd bod arnynt eu hofn hwy.

³⁹Lledaenodd gwmwl i'w gorchuddio,

a thân i oleuo iddynt yn y nos.

⁴⁰Pan fu iddynt ofyn, anfonodd soflieir iddynt,

a digonodd hwy â bara'r nefoedd.

⁴¹Holltodd graig nes bod dŵr yn pistyllio,

ac yn llifo fel afon trwy'r diffeithwch.

⁴²Oherwydd yr oedd yn cofio ei addewid sanctaidd

i Abraham ei was.

⁴³Dygodd ei bobl allan mewn llawenydd,

ei rai etholedig mewn gorfoledd.

⁴⁴Rhoes iddynt diroedd y cenhedloedd,

a chymerasant feddiant o ffrwyth llafur pobloedd,

⁴⁵er mwyn iddynt gadw ei ddeddfau,

ac ufuddhau i'w gyfreithiau.

Molwch yr ARGLWYDD.