Read the Bible

²“O na ellid pwyso fy nhrallod,

a gosod fy aflwydd i gyd mewn clorian!

³Yna byddai'n drymach na thywod y môr;

am hyn y bu fy ngeiriau yn fyrbwyll.

⁴Y mae saethau'r Hollalluog ynof;

yfodd fy ysbryd eu gwenwyn;

dychryn Duw sy'n gwarchae amdanaf.

⁵A yw'r asyn gwyllt yn nadu uwchben glaswellt?

A yw'r ych yn brefu uwchben ei borthiant?

⁶A fwyteir yr hyn sydd ddi-flas heb halen?

A oes blas ar sudd y malws?

⁷Y mae fy stumog yn eu gwrthod;

y maent fel pydredd fy nghnawd.

⁸“O na ddôi fy nymuniad i ben,

ac na chyflawnai Duw fy ngobaith!

⁹O na ryngai fodd i Dduw fy nharo,

ac estyn ei law i'm torri i lawr!

¹⁰Byddai o hyd yn gysur imi,

a llawenhawn yn yr ing diarbed

(nid wyf yn gwadu geiriau'r Sanct).

¹¹Pa nerth sydd gennyf i obeithio,

a beth fydd fy niwedd, fel y byddwn yn amyneddgar?

¹²Ai nerth cerrig yw fy nerth?

Ai pres yw fy nghnawd?

¹³Wele, nid oes imi gymorth ynof,

a gyrrwyd llwyddiant oddi wrthyf.

¹⁴Daw teyrngarwch ei gyfaill i'r claf,

er iddo gefnu ar ofn yr Hollalluog.

¹⁵Twyllodd fy mrodyr fi fel ffrwd ysbeidiol;

fel nentydd sy'n gorlifo,

¹⁶yn dywyll gan rew,

ac eira yn cuddio ynddynt.

¹⁷Ond pan ddaw poethder fe beidiant,

ac yn y gwres diflannant o'u lle.

¹⁸Troella'r carafanau yn eu ffyrdd,

crwydrant i'r diffeithle, a chollir hwy.

¹⁹Y mae carafanau Tema yn edrych amdanynt,

a marsiandïwyr Sheba yn disgwyl wrthynt.

²⁰Cywilyddir hwy yn eu hyder;

dônt atynt, ac fe'u siomir.

²¹Felly yr ydych chwithau i mi;

gwelwch drychineb, a dychrynwch.

²²A ddywedais o gwbl, ‘Rhowch imi,

ac estynnwch rodd drosof o'ch cyfoeth;

²³achubwch fi o afael y gelyn,

a rhyddhewch fi o afael gormeswyr’?

²⁴“Hyfforddwch fi, a thawaf;

a dangoswch imi sut y cyfeiliornais.

²⁵Mor ddi-flas yw geiriau uniawn!

Pa gerydd sydd yng ngherydd un ohonoch chwi?

²⁶A ydych yn credu y gallwch geryddu geiriau,

gan fod ymadroddion y diobaith yn wynt?

²⁷A fwriech goelbren am yr amddifad,

a tharo bargen am un o'ch cyfeillion?

²⁸Ond yn awr, bodlonwch i droi ataf;

ai celwydd a ddywedaf yn eich gŵydd?

²⁹Trowch; na foed anghyfiawnder.

Trowch eto; ar hyn y saif fy nghyfiawnhad.

³⁰A oes anghyfiawnder ar fy nhafod?

Onid yw taflod fy ngenau yn adnabod cam flas?”