Read the Bible

²“Pwy yw hwn sy'n tywyllu cyngor

â geiriau diwybod?

³Gwna dy hun yn barod i'r ornest;

fe holaf fi di, a chei dithau ateb.

⁴“Ble'r oeddit ti pan osodais i sylfaen i'r ddaear?

Ateb, os gwyddost.

⁵Pwy a benderfynodd ei mesurau? Mae'n siŵr dy fod yn gwybod!

Pwy a estynnodd linyn mesur arni?

⁶Ar beth y seiliwyd ei sylfeini,

a phwy a osododd ei chonglfaen?

⁷Ble'r oeddit ti pan oedd sêr y bore i gyd yn llawenhau,

a'r holl angylion yn gorfoleddu,

⁸pan gaewyd ar y môr â dorau,

pan lamai allan o'r groth,

⁹pan osodais gwmwl yn wisg amdano,

a'r caddug yn rhwymyn iddo,

¹⁰a phan drefnais derfyn iddo,

a gosod barrau a dorau,

¹¹a dweud, ‘Hyd yma yr ei, a dim pellach,

ac yma y gosodais derfyn i ymchwydd dy donnau’?

¹²“A wyt ti, yn ystod dy fywyd, wedi gorchymyn y bore

a dangos ei lle i'r wawr,

¹³er mwyn iddi gydio yng nghonglau'r ddaear,

i ysgwyd y drygionus ohoni?

¹⁴Y mae'n newid ffurf fel clai dan y sêl,

ac yn sefyll allan fel plyg dilledyn.

¹⁵Atelir eu goleuni oddi wrth y drygionus,

a thorrir y fraich ddyrchafedig.

¹⁶“A fedri di fynd at ffynhonnell y môr,

neu gerdded yng nghuddfa'r dyfnder?

¹⁷A agorwyd pyrth angau i ti,

neu a welaist ti byrth y fagddu?

¹⁸A fedri di ddirnad maint y ddaear?

Dywed, os wyt ti'n deall hyn i gyd.

¹⁹“Prun yw'r ffordd i drigfan goleuni,

ac i le tywyllwch,

²⁰fel y gelli di ei chymryd i'w therfyn,

a gwybod y llwybr i'w thŷ?

²¹Fe wyddost, am dy fod wedi dy eni yr adeg honno,

a bod nifer dy ddyddiau yn fawr!

²²“A fuost ti yn ystordai'r eira,

neu'n gweld cistiau'r cesair?

²³Dyma'r pethau a gedwais at gyfnod trallod,

at ddydd brwydr a rhyfel.

²⁴Prun yw'r ffordd i'r fan lle y rhennir goleuni,

ac y gwasgerir gwynt y dwyrain ar y ddaear?

²⁵“Pwy a wnaeth sianel i'r cenllif glaw,

a llwybr i'r daranfollt,

²⁶i lawio ar dir heb neb ynddo,

a diffeithwch heb unrhyw un yn byw ynddo,

²⁷i ddigoni'r tir diffaith ac anial,

a pheri i laswellt dyfu yno?

²⁸“A oes tad i'r glaw?

Pwy a genhedlodd y defnynnau gwlith?

²⁹O groth pwy y daw'r rhew?

A phwy a genhedlodd y llwydrew,

³⁰i galedu'r dyfroedd fel carreg,

a rhewi wyneb y dyfnder?

³¹A fedri di gau cadwynau Pleiades,

neu ddatod rhwymau Orion?

³²A fedri di ddwyn Masaroth allan yn ei bryd,

a thywys yr Arth gyda'i phlant?

³³A wyddost ti reolau'r awyr?

A fedri di gymhwyso i'r ddaear ei threfn?

³⁴“A fedri di alw ar y cwmwl

i beri i ddyfroedd lifo drosot?

³⁵A fedri di roi gorchymyn i'r mellt,

iddynt ddod atat a dweud, ‘Dyma ni’?

³⁶Pwy a rydd ddoethineb i'r cymylau,

a deall i'r niwl?

³⁷Gan bwy y mae digon o ddoethineb i gyfrif y cymylau?

A phwy a wna i gostrelau'r nefoedd arllwys,

³⁸nes bod llwch yn mynd yn llaid,

a'r tywyrch yn glynu wrth ei gilydd?

³⁹“Ai ti sydd yn hela ysglyfaeth i'r llew,

a diwallu angen y llewod ifanc,

⁴⁰pan grymant yn eu gwâl,

ac aros dan lwyn am helfa?

⁴¹Pwy sy'n trefnu bwyd i'r frân,

pan waedda'r cywion ar Dduw,

a hedfan o amgylch heb fwyd?”