Read the Bible

²“O na byddwn fel yn yr amser gynt,

yn y dyddiau pan oedd Duw yn fy ngwarchod,

³pan wnâi i'w lamp oleuo uwch fy mhen,

a minnau'n rhodio wrth ei goleuni trwy'r tywyllwch;

⁴pan oeddwn yn nyddiau f'anterth,

a Duw'n cysgodi dros fy nhrigfan;

⁵pan oedd yr Hollalluog yn parhau gyda mi,

a'm plant o'm cwmpas.

⁶Gallwn olchi fy nghamau mewn llaeth,

ac yr oedd y graig yn tywallt ffrydiau o olew imi.

⁷“Awn allan i borth y ddinas,

ac eisteddwn yn fy sedd ar y sgwâr;

⁸a phan welai'r llanciau fi, cilient,

a chodai'r hynafgwyr ar eu traed;

⁹peidiai'r arweinwyr â llefaru,

a rhoddent eu llaw ar eu genau;

¹⁰tawai siarad y pendefigion,

a glynai eu tafod wrth daflod eu genau.

¹¹“Pan glywai clust, galwai fi'n ddedwydd,

a phan welai llygad, canmolai fi;

¹²oherwydd gwaredwn y tlawd a lefai,

a'r amddifad a'r diymgeledd.

¹³Bendith yr un ar ddarfod amdano a ddôi arnaf,

a gwnawn i galon y weddw lawenhau.

¹⁴Gwisgwn gyfiawnder fel dillad amdanaf;

yr oedd fy marn fel mantell a thwrban.

¹⁵Yr oeddwn yn llygaid i'r dall,

ac yn draed i'r cloff.

¹⁶Yr oeddwn yn dad i'r tlawd,

a chwiliwn i achos y sawl nad adwaenwn.

¹⁷Drylliwn gilddannedd yr anghyfiawn,

a pheri iddo ollwng yr ysglyfaeth o'i enau.

¹⁸Yna dywedais, ‘Byddaf farw yn f'anterth,

a'm dyddiau mor niferus â'r tywod,

¹⁹a'm gwreiddiau yn ymestyn at y dyfroedd,

a'r gwlith yn aros drwy'r nos ar fy mrigau,

²⁰a'm hanrhydedd o hyd yn iraidd,

a'm bwa yn adnewyddu yn fy llaw.’

²¹“Gwrandawai pobl arnaf,

a disgwylient yn ddistaw am fy nghyngor.

²²Wedi imi lefaru, ni ddywedent air;

diferai fy ngeiriau arnynt.

²³Disgwylient wrthyf fel am y glaw,

ac agorent eu genau fel am law y gwanwyn.

²⁴Pan wenwn arnynt, oni chaent hyder?

A phan lewyrchai fy wyneb, ni fyddent brudd.

²⁵Dewiswn eu ffordd iddynt, ac eistedd yn ben arnynt;

eisteddwn fel brenin yng nghanol ei lu,

fel un yn cysuro'r galarus.”