Read the Bible

²“Am ba hyd y blinwch fi,

a'm dryllio â geiriau?

³Yr ydych wedi fy ngwawdio ddengwaith,

ac nid oes arnoch gywilydd fy mhoeni.

⁴Os yw'n wir imi gyfeiliorni,

onid arnaf fi fy hun y mae'r bai?

⁵Os ydych yn wir yn eich gwneud eich hunain yn well na mi,

ac yn fy nghondemnio o achos fy ngwarth,

⁶ystyriwch yn awr mai Duw sydd wedi gwneud cam â mi,

ac wedi taflu ei rwyd o'm hamgylch.

⁷Os gwaeddaf, ‘Trais’, ni chaf ateb;

os ceisiaf help, ni chaf farn deg.

⁸Caeodd fy ffordd fel na allaf ddianc,

a gwnaeth fy llwybr yn dywyll o'm blaen.

⁹Cipiodd f'anrhydedd oddi arnaf,

a symudodd y goron oddi ar fy mhen.

¹⁰Bwriodd fi i lawr yn llwyr, a darfu amdanaf;

diwreiddiodd fy ngobaith fel coeden.

¹¹Enynnodd ei lid yn f'erbyn,

ac fe'm cyfrif fel un o'i elynion.

¹²Daeth ei fyddinoedd ynghyd;

gosodasant sarn hyd ataf,

ac yna gwersyllu o amgylch fy mhabell.

¹³“Cadwodd fy mherthnasau draw oddi wrthyf,

ac aeth fy nghyfeillion yn ddieithr.

¹⁴Gwadwyd fi gan fy nghymdogion a'm cydnabod,

ac anwybyddwyd fi gan fy ngweision.

¹⁵Fel dieithryn y meddylia fy morynion amdanaf;

estron wyf yn eu golwg.

¹⁶Galwaf ar fy ngwas, ond nid yw'n fy ateb,

er i mi erfyn yn daer arno.

¹⁷Aeth fy anadl yn atgas i'm gwraig,

ac yn ddrewdod i'm plant fy hun.

¹⁸Dirmygir fi hyd yn oed gan blantos;

pan godaf ar fy nhraed, y maent yn troi cefn arnaf.

¹⁹Ffieiddir fi gan fy nghyfeillion pennaf;

trodd fy ffrindiau agosaf yn f'erbyn.

²⁰Y mae fy nghnawd yn glynu wrth fy esgyrn,

a dihengais â chroen fy nannedd.

²¹“Cymerwch drugaredd arnaf, fy nghyfeillion,

oherwydd cyffyrddodd llaw Duw â mi.

²²Pam yr erlidiwch fi fel y gwna Duw?

Oni chawsoch ddigon ar ddifa fy nghnawd?

²³O na fyddai fy ngeiriau wedi eu hysgrifennu!

O na chofnodid hwy mewn llyfr,

²⁴wedi eu hysgrifennu â phin haearn a phlwm,

a'u naddu ar garreg am byth!

²⁵Oherwydd gwn fod fy amddiffynnwr yn fyw,

ac y saif o'm plaid yn y diwedd;

²⁶ac wedi i'm croen ddifa fel hyn,

eto o'm cnawd caf weld Duw.

²⁷Fe'i gwelaf ef o'm plaid;

ie, fy llygaid fy hun a'i gwêl, ac nid yw'n ddieithr.

Y mae fy nghalon yn dyheu o'm mewn.

²⁸“Os dywedwch, ‘Y fath erlid a fydd arno,

gan fod gwreiddyn y drwg ynddo,’

²⁹yna arswydwch rhag y cleddyf,

oherwydd daw cynddaredd â chosb y cleddyf,

ac yna y cewch wybod fod barn.”